कमी कालावधीत रोख पैसे मिळवून देणारे पीक म्हणून शेतकरी मूग पिकाची कोरडवाहू पट्ट्यात आंतरपीक म्हणूनही लागवड करतात. मात्र, यंदाच्या हंगामात लागवड झालेल्या मुगाचे संपूर्ण पीक कीड आणि रोगांमुळे शेतकर्‍यांच्या हातातून गेले आहे. त्यामुळे लागवडीसाठी केलेला खर्चसुद्धा निघण्याची शक्यता नाही. यामुळे शेतकरी आर्थिक अडचणीत सापडला आहे. त्यामुळे संबंधित विभागाने नुकसानग्रस्त पिकाची पाहणी करून नुकसान भरपाई द्यावी, अशी मागणी परिसरातील शेतकर्‍यांमधून होत आहे.
बिदाल : कमी कालावधीत रोख पैसे मिळवून देणारे पीक म्हणून शेतकरी मूग पिकाची कोरडवाहू पट्ट्यात आंतरपीक म्हणूनही लागवड करतात. मात्र, यंदाच्या हंगामात लागवड झालेल्या मुगाचे संपूर्ण पीक कीड आणि रोगांमुळे शेतकर्‍यांच्या हातातून गेले आहे. त्यामुळे लागवडीसाठी केलेला खर्चसुद्धा निघण्याची शक्यता नाही. यामुळे शेतकरी आर्थिक अडचणीत सापडला आहे. त्यामुळे संबंधित विभागाने नुकसानग्रस्त पिकाची पाहणी करून नुकसान भरपाई द्यावी, अशी मागणी परिसरातील शेतकर्‍यांमधून होत आहे.
अधिक क्षेत्रावरील पीक रोग आणि किडींमुळे फस्त झाले आहे. सध्या मुगाचे पीक उभे दिसत असले तरी एकाही झाडावर शेंगा लागलेल्या नाहीत. मुगावर लागवडीनंतर साधारणतः महिनाभरातच पाने अकडून पिकाची वाढ थांबली. यामुळे माण तालुक्यातील विरळी, मार्डी, शिखर शिंगणापूर, वावहिरे, गोंदवले, पळशी, बिदाल, तोंडले, मलवडी, आंधळी, टाकेवाडी या भागातील शेतकरी अडचणीत सापडलेला आहे.
काही शेतकर्‍यांनी विविध प्रकारच्या औषधांची फवारणी करीत पीक वाचवण्याचा प्रयत्न केला. परंतु, हे प्रयत्न अपयशी ठरले आहेत. सध्या उभे दिसत असलेल्या पिकात शेंगाच लागलेल्या नाहीत. ज्या झाडांवर शेंगा लागल्या त्या आठवडाभरापासून सुरू असलेल्या पावसाने खराब झाल्या आहेत. यामुळे यंदाच्या हंगामात संपूर्ण मुगाचे पीक शंभर टक्के शेतकर्‍यांच्या हातातून गेले आहे.
शेतकरी माण बाजार समितीच्या कारभारावर नाराज
कृषी विभागाच्या योजना सर्वसामान्य शेतकर्‍यांपर्यंत पोहोचत नाहीत. अधिकारी शेतकर्‍यावर बांधावर कधी प्रत्यक्ष येऊन पाहणी करत नाहीत. तर बाजार समितीचे संचालक शेतकर्‍यांच्या मालाला योग्य भाव मिळावा यासाठी प्रयत्न करत नसल्याने शेतकरी माण बाजार समितीच्या संचालकावर व कृषी विभागावर नाराज आहे.
