पुणे:पुणे येथील मांजरी परिसरात असलेल्या ' सीरम इन्स्टिट्युट 'मध्ये आगीचा भडका उडाला असून आग आटोक्यात आणण्याचे शर्थीचे प्रयत्न सुरू आहेत. काही वेळापूर्वीच राष्ट्रीय आपत्ती निवारण दलाचे (एनडीआरएफ) एक पथकही सीरममध्ये दाखल झाले आहे. दरम्यान, या आगीचे नेमके कारण अद्याप स्पष्ट झालेले नसताना भाजपच्या आमदार मुक्ता टिळक यांनी या आगीमागे घातपाताची शक्यता वर्तविली आहे. ही माझी वैयक्तिक शंका असल्याचेही त्यांनी नमूद केले आहे. आतापर्यंत हाती आलेल्या माहितीनुसार, बिसीजी प्लांट असलेल्या इमारतीमध्ये ही आग लागली आहे. पंतप्रधान नरेंद्र मोदी यांनी सीरम इन्स्टिट्युटला भेट दिली होती त्यावेळी याच इमारतीत त्यांचे स्वागत झाले होते. सध्यातरी शॉर्टसर्किटमुळे ही आग लागल्याचा प्राथमिक अंदाज वर्तविण्यात येत आहे. मात्र, करोनाची लस याठिकाणी तयार करण्यात येत असल्याने सर्व यंत्रणा या घटनेकडे गांभीर्याने पाहत आहेत. गुप्तचर यंत्रणेने ही आग शॉर्टसर्किटमुळे आग लागली आहे की अन्य काही कारणांमुळे ही आग लागली, याचाही शोध घेण्यास सुरुवात केली आहे. या सगळ्या पार्श्वभूमीवर पुण्याच्या माजी महापौर आणि आमदार मुक्ता टिळक यांनी या घटनेबाबत साशंकता व्यक्त केली आहे. मला हा घातपाताचा प्रकार वाटत आहे. प्रथमदर्शनी हे माझे मत आहे. जिथे आग लागली त्या परिसरातच करोनावरील लस बनवण्याचे काम सुरू आहे. म्हणून घातपाताच्या शक्यतेचा विचार करून त्यादिशेने तपास करायला हवा, असे मुक्ता टिळक यांनी सांगितले. दुपारी दीड वाजताच्या सुमारास ही आग लागली. सुदैवाने कोविशिल्ड लसची निर्मिती जिथे होत आहे ती इमारत सुरक्षित आहे. या दुर्घटनेत कोणतीही जीवितहानीही झालेली नाही, अशी माहितीही टिळक यांनी माध्यमांना दिली. मुक्ता टिळक यांच्यानंतर वंचित बहुजन आघाडीचे प्रमुख अॅड. प्रकाश आंबेडकर यांनीही ही घटना गंभीर असल्याचे नमूद करत आग लागली की लावली याची चौकशी व्हायला हवी अशी मागणी केली आहे.