रहिमतपूरमध्ये कोरोनाच्या वाढत्या प्रादुर्भावाच्या पार्श्‍वभूमीवर कोरेगाव तालुक्यातील व कराड उत्तर विधानसभा मतदार संघातील सर्वात मोठी लोकसंख्या असलेल्या रहिमतपूर शहरामध्ये कोरोनाच्या परिस्थितीचा विचार करून मंडळ विरहित गणेशोत्सव साजरा करण्याचा निर्णय एकमुखाने घेण्यात आला.
रहिमतपूर : रहिमतपूरमध्ये कोरोनाच्या वाढत्या प्रादुर्भावाच्या पार्श्‍वभूमीवर कोरेगाव तालुक्यातील व कराड उत्तर विधानसभा मतदार संघातील सर्वात मोठी लोकसंख्या असलेल्या रहिमतपूर शहरामध्ये कोरोनाच्या परिस्थितीचा विचार करून मंडळ विरहित गणेशोत्सव साजरा करण्याचा निर्णय एकमुखाने घेण्यात आला.
रहिमतपूर पोलीस स्टेशन व रहिमतपूर नगरपरिषद यांच्या संयुक्त विद्यमाने शहरात कोरोनाच्या पार्श्‍वभूमीवर सार्वजनिक गणेशोत्सव मंडळांची बैठक आयोजित केली होती.
या बैठकीस प्रभारी पोलीस अधीक्षक बी. बी. महामुनी, सहायक पोलीस निरीक्षक घनश्याम बल्लाळ, रहिमतपूर नगरपरिषदेचे लोकनियुक्त नगराध्यक्ष आनंदा कोरे, उपनगराध्यक्षा माधुरी भोसले, माजी नगराध्यक्ष वासुदेव माने, नगरसेवक विद्याधर बाजारे, शिवराज माने शशिकांत भोसले, तानाजी राऊत, विनायक माने, जितेंद्र माने, विरोधी पक्ष नेते नीलेश माने, हे. कॉ. सचिन राठोड, पत्रकार अविनाश कदम, शहरातील विविध गणेशोत्सव मंडळांचे अध्यक्ष, उपाध्यक्ष व पदाधिकारी उपस्थित होते.
महामुनी म्हणाले, ‘सध्या कोरोनाचा वाढता प्रादुर्भाव सगळीकडे आहे. या पार्श्‍वभूमीवर गणेशोत्सव मंडळ विरहित साजरा करण्यात यावा.’
नगराध्यक्ष आनंदा कोरे म्हणाले, ‘कोरोना महामारीने सर्वच ठिकाणी थैमान घातले असताना सुद्धा रहिमतपूरकर, वैद्यकीय अधिकारी, पोलीस अधिकारी, पत्रकार, नागरिक यांच्या सहकार्याने गेली चार महिने रहिमतपूरच्या आजूबाजूला आजवर शिरकाव होऊन सुद्धा रहिमतपूर शहरात एकही रुग्ण पॉझिटिव्ह मिळू शकला नव्हता; पण गेल्या काही दिवसांपासून रहिमतपूर शहरात कोरोनाचे पॉझिटिव्ह रुग्ण मिळून आल्याने यंदाचा गणेशोत्सव हा सार्वजनिक मंडळ विरहित करावा.’
वासुदेव माने म्हणाले, ‘रहिमतपूर शहराला एक वसा आणि वारसा असून, सामाजिक बांधिलकी जपणारे हे शहर आहे. अशा आणीबाणीच्या वेळी सर्व रहिमतपूरचे नागरिक एकजुटीने प्रशासनाला सहकार्य करतील.सार्वजनिक गणेशोत्सव मंडळ विरहित गणेश उत्सव साजरा करण्यासाठी आम्ही सर्वजण एकजुटीने प्रयत्न करू.’
प्रभारी पोलीस अधीक्षक बी. बी. महामुनी, सपोनि घनश्याम बल्लाळ, नगराध्यक्ष आनंदा कोरे, माजी नगराध्यक्ष वासुदेव माने व पदाधिकार्‍यांच्या आवाहनास प्रतिसाद देऊन कोरोनाच्या पार्श्‍वभूमीवर यंदा सर्व गणेशोत्सव मंडळाच्या अध्यक्ष, उपाध्यक्ष व पदाधिकार्‍यांनी गणेशोत्सव अत्यंत साधेपणाने साजरा करण्याचा निर्णय घेतला.
