तडवळे (ता. खटाव) येथील ग्रामपंचायतीच्या सरपंचपदी गणपत निवृत्ती खाडे-पाटील यांची तर उपसरपंचपदी संगीता भीमराव माळवे यांची बिनविरोध निवड झाली. त्रिशंकू संख्याबळाच्या परिस्थितीत नाट्यमय घडामोडी घडण्याबरोबर ‘पाटीलकी’ने आपल्या राजकीय कौशल्याचा वापर करत पुन्हा एकदा ग्रामपंचायतीवर वर्चस्व प्रस्थापित केले आहे.
तडवळे : तडवळे (ता. खटाव) येथील ग्रामपंचायतीच्या सरपंचपदी गणपत निवृत्ती खाडे-पाटील यांची तर उपसरपंचपदी संगीता भीमराव माळवे यांची बिनविरोध निवड झाली. त्रिशंकू संख्याबळाच्या परिस्थितीत नाट्यमय घडामोडी घडण्याबरोबर ‘पाटीलकी’ने आपल्या राजकीय कौशल्याचा वापर करत पुन्हा एकदा ग्रामपंचायतीवर वर्चस्व प्रस्थापित केले आहे.
सरपंच खाडे-पाटील यांना शरद आत्माराम पाटील, पुष्पावती बाबासो मदने व प्रकाश निवृत्ती पाटोळे, संगीता माळवे अशा पाच जणांनी सहकार्य केले. ग्रामपंचायतीच्या निवडणुकीमध्ये शरद आत्माराम पाटील यांच्या गटाचे तीन उमेदवार विजयी होऊन मार्केट कमिटीचे उपसभापती डॉ. प्रकाश पाटोळे व गणपत खाडे यांनी युवा नेते शरद पाटील यांना सहकार्य केल्याने सर्वात ज्येष्ठ म्हणून सर्वांनी गणपती खाडे अण्णा यांना सरपंचपदी अर्ज दाखल केला होता. तर विरोधी गटाच्या सरपंच पदाच्या उमेदवार मालन दादा साबळे यांना बाळासो गणपत पवार, रूपाली बबन खाडे व अलका शंकर पळे अशी चार मते मिळाली. गणपत निवृत्ती खाडे हे पाच मते घेऊन सरपंचपदी विराजमान झाले.
तर उपसरपंचपदी संगीता भीमराव माळवे व अलका शंकर पळे यांचा अर्ज दाखल झाला. मात्र, अलका शंकर पळे यांनी अर्ज माघारी घेतल्याने उपसरपंच पदासाठी एकमेव अर्ज संगीता भीमराव माळवे राहिल्याने त्या उपसरपंचपदी निवड झाल्याचे अध्यासी अधिकारी तिकुटे यांनी जाहीर केले.
अध्यासी अधिकारी तिकुटे यांनी निवडणूक निर्णय अधिकारी म्हणून काम पाहिले तर सचिव म्हणून ग्रामसेवक सस्ते एस. एच. यांनी सहकार्य केले. सरपंच, उपसरपंच यांचे ग्रामस्थ व अनेक तरुण मंडळ यांनी या निवडीबद्दल अभिनंदन केले. तर सरपंच खाडे-पाटील व उपसरपंच साबळे यांच्या समर्थकांनी निवडीनंतर गुलालाची उधळण करत फटाक्यांची आतषबाजी केली.