खटाव तालुक्यात बहुतांशी गावात कोरोनाचे रुग्ण सापडत आहेत. सुरुवातीच्या काळात एखाद्या गावात रुग्ण आढळून आला की त्या ठिकाणी तहसीलदार, गटविकास अधिकारी, पोलीस निरीक्षक, तालुका वैद्यकीय अधिकारी आदींसह इतर अधिकारी, कर्मचार्यांचा ताफा त्या गावात जाऊन गावातील प्रमुख पदाधिकार्यांना खबरदारीच्या सूचना देत होता.
वडूज : खटाव तालुक्यात बहुतांशी गावात कोरोनाचे रुग्ण सापडत आहेत. सुरुवातीच्या काळात एखाद्या गावात रुग्ण आढळून आला की त्या ठिकाणी तहसीलदार, गटविकास अधिकारी, पोलीस निरीक्षक, तालुका वैद्यकीय अधिकारी आदींसह इतर अधिकारी, कर्मचार्यांचा ताफा त्या गावात जाऊन गावातील प्रमुख पदाधिकार्यांना खबरदारीच्या सूचना देत होता. गावाला जोडणार्या प्रमुख रस्त्यावर बॅरिकेट बांधून रस्ते सील करून त्या ठिकाणी पोलीस, होमगार्ड अथवा आरएसपी शिक्षकांचा खडा पहारा ठेवला जात होता. आता मात्र पॉझिटिव्ह रुग्णांची संख्या झपाट्याने वाढू लागल्याने नेमके कोठे जायचे? उपाययोजना कशा करावयाच्या या व्यापात वरिष्ठ अधिकारी पडले आहेत. त्यामुळे एखादा दुसरा रुग्ण सापडलेल्या गावाकडे प्रशासनाचे दुर्लक्षही होत आहे.
असाच प्रकार वडूजपासून अंदाजे 6 किमी अंतरावर असणार्या डाळमोडी गावच्या बाबतीत घडला आहे. या गावात ग्रामपंचायतीचा एक कर्मचारी तसेच वडूज येथील मेडिकलमध्ये काम करणारा कामगार बाधित सापडला आहे. त्यांना दिलासा देण्यासाठी खटाव तालुका सोशल फाउंडेशन व विजयदादा शिंदे मित्र मंडळाच्या वतीने ग्रा. पं. कर्मचार्याच्या घरी जाऊन अन्नधान्य साहित्य, जीवनावश्यक किराणा साहित्य पोहोच करण्यात आले. तर गावामध्ये रोगराई निर्माण होऊ नये याकरिता औषध फवारणी पंप, ऑक्सिजन, बी. पी. चेक करण्याचे मशीनही भेट देण्यात आले. शिंदे यांच्यासह संस्थापक धनंजय क्षीरसागर यांच्या हस्ते हे वाटप करण्यात आले.
या वेळी हणमंतराव चौधरी, अजित माने, सुशांत चौधरी, अर्जुन शिबे, विश्वास शिबे, आकाश चौधरी, नाना चौधरी, अशोक चौधरी, अनिल चौधरी, शिवाजी माने, कुंडलिक चौधरी, तुषार माने, तुकाराम चौधरी, गुलाबराव माने, आरोग्य सेविका वनिता भुजबळ आदी उपस्थित होते.
वडूज कोविड केंद्रासाठीही खारीचा वाटा
विजय शिंदे मित्र मंडळातर्फे वडूज येथील ग्रामीण रुग्णालयात होणार्या कोविड केअर सेंटर, कातरखटाव प्रा. आ. केंद्राच्या आरोग्य कर्मचार्यांना साहित्य खरेदी करण्यासाठी आर्थिक मदत प्रदान करण्यात आली. नगरपंचायतीचे मुख्याधिकारी माधव खांडेकर, वैद्यकीय अधिकारी डॉ. वैशाली चव्हाण यांनी मदतीचा धनादेश स्वीकारला. या वेळी सुनील गोडसे, किशोरी पाटील, सचिन माळी, राजेंद्र चव्हाण, राजू कुंभार, दीपक बोडरे आदी उपस्थित होते. या खारीच्या वाट्याने मित्र मंडळाने पहिली देणगी देऊन शुभारंभ केल्याबद्दल मुख्याधिकारी खांडेकर यांनी धन्यवाद दिले.