दुकानात खरेदीसाठी आलेल्या महिलेने दुकानातील कामास असलेल्या महिला कर्मचार्याचा मोबाईल चोरल्याची घटना शहरातील एका चप्पल दुकानात घडली असून, अनोळखी महिलेच्या विरोधात शहर पोलीस ठाण्यात गुन्हा दाखल करण्यात आला आहे.
फलटण : दुकानात खरेदीसाठी आलेल्या महिलेने दुकानातील कामास असलेल्या महिला कर्मचार्याचा मोबाईल चोरल्याची घटना शहरातील एका चप्पल दुकानात घडली असून, अनोळखी महिलेच्या विरोधात शहर पोलीस ठाण्यात गुन्हा दाखल करण्यात आला आहे.
शहर पोलीस ठाण्यात दाखल फिर्यादीनुसार फिर्यादी सीमा महेंद्र भाटी (रा. गोळेगाव पुनर्वसन, ता. फलटण) या शहरातील एका चप्पल दुकानात कामास असून, दि. 12 रोजी सायंकाळी 4 वाजण्याच्या सुमारास दुकानात काम करीत असताना फिर्यादी महिला कामगार हातातला मोबाईल ग्राहक बसतात त्या बाकड्यावर ठेवून बँकेचे स्टेटमेंट पाहत होत्या. तेवढ्यात एक महिला लहान मुलीला घेऊन दुकानात आली असता फिर्यादी यांनी ‘तुम्हाला काय पाहिजे आहे,’ असे विचारले. त्यावर ती महिला ‘माझ्या लहान मुलीला शूज घ्यायचे आहेत,’ असे म्हणाली.
यानंतर फिर्यादी त्या महिलेस शूज दाखवायला लागली. त्याचवेळेस दोन पुरुष ग्राहक आले असता ती महिला म्हणाली की, ‘माझी बहीण पाठीमागून येत आहे. तोपर्यंत तुम्ही या दोघांना काय घ्यायचे आहे ते पहा,’ अशी म्हणाली. फिर्यादी दुसरे आलेले ग्राहक यांना चप्पल दाखवत असताना ती महिला दुकानाच्या मालकीण यांना मी सॅन्डल घ्यायला पैसे घेऊन येते, असे म्हणून ती दुकानात निघून गेली. त्यानंतर फिर्यादी यांच्या लक्षात आले की, त्यांचा मोबाईल बाकड्यावर ठेवलेल्या ठिकाणी दिसत नाही. यानंतर मोबाईल नंबरवर फोन केला असता तो फोन उचलला गेला त्यावेळेस एका अनोळखी स्त्रीचा आवाज ऐकू आला व हा नंबर कोणाचा आहे, कोणास ठाऊक, असे म्हणून फोन ठेवला. फिर्यादी यांनी परत फोन केला असता फोन त्यांचा चोरीला गेलेला मोबाईल बंद लागला. त्यानंतर फिर्यादी यांनी दुकानात असलेले सीसीटीव्ही फुटेज पाहिले त्यावेळेस ती महिला फिर्यादी यांचा मोबाईल घेताना दिसली. यानंतर फिर्यादी सीमा महेंद्र भाटी यांनी अनोळखी महिलेच्या विरोधात शहर पोलीस ठाण्यात मोबाईल चोरीचा गुन्हा दाखल केला.