‘ग्रामीण भागासाठी फेरोसिमेंट तंत्रज्ञान उपयुक्त असून, त्याचा वापर वाढल्यास ग्रामीण तरुणांना व्यवसाय उपलब्ध होऊ शकेल. याशिवाय ग्रामीण महिलांना गावातच रोजगारही उपलब्ध होऊ शकेल,’ असे मत महाराष्ट्र शासनाचे जलसंपदा विभागाचे निवृत्त सचिव (लाभ क्षेत्र विकास) राजेंद्र पवार यांनी व्यक्त केले.
पुणे : ‘ग्रामीण भागासाठी फेरोसिमेंट तंत्रज्ञान उपयुक्त असून, त्याचा वापर वाढल्यास ग्रामीण तरुणांना व्यवसाय उपलब्ध होऊ शकेल. याशिवाय ग्रामीण महिलांना गावातच रोजगारही उपलब्ध होऊ शकेल,’ असे मत महाराष्ट्र शासनाचे जलसंपदा विभागाचे निवृत्त सचिव (लाभ क्षेत्र विकास) राजेंद्र पवार यांनी व्यक्त केले.
पुण्यातील फेरोसिमेंट सोसायटीतर्फे ज्ञान प्रबोधिनीच्या प्रदीप जाधव यांना नुकताच ‘विष्णू जोशी स्मृती उत्कृष्ट कारागीर’ पुरस्कार पवार यांच्या हस्ते नुकताच प्रदान करण्यात आला. त्यावेळी ते बोलत होते.
यावेळी फेरोसिमेंट सोसायटीचे अध्यक्ष चंद्रमोहन हंगेकर व सचिव पद्मनाभ लेले हे उपस्थित होते. या पुरस्काराचे स्मृतिचिन्ह व रुपये पाच हजार असे स्वरूप आहे.
फेरोसिमेंट तंत्रज्ञान हे जलरोधक असल्याने त्याचा पाण्याच्या संबंध असलेल्या ठिकाणी ते उपयोगात आणले जाते. महाराष्ट्रात ठिकठिकाणी ग्रामीण भागात फेरोसिमेट तंत्रज्ञानाचा प्रचार-प्रसार करण्यात मुंबईमधील जलवर्धिनी संस्थेचे अध्यक्ष उल्हास परांजपे यांचे मोठे योगदान आहे, असेही पवार यावेळी आवर्जून नमूद केले.
फेरोसिमेंट सोसायटीचे अध्यक्ष चंद्रमोहन हंगेकर यांनी सांगितले की, ‘बांधकामाचे फेरोसिमेंट तंत्रज्ञान हे पर्यावरणपूरक असून यातून ग्रामीण भागात घरे अथवा जनावरांचे गोठे कमी खर्चात बांधता येणे शक्य आहे. त्यासाठी वेल्डर, बार बेंडर, गवंडी यासारख्या गावपातळीवरील कारागिर मंडळींना प्रशिक्षण देऊन उत्तेजन देणे गरजेचे आहे. या कारागिरांना प्रोत्साहन देण्यासाठीच फेरोसिमेंट सोसायटीतर्फे या पुरस्काराची योजना करण्यात आलेली आहे.
ज्ञान प्रबोधिनीच्या ग्राम विकसन विभागातील प्रदीप जाधव यांनी ग्रामीण भागात पाणी साठवणुकीचे तुलनेने कमी खर्चातील फेरोसिमेंट तंत्रज्ञान चांगल्याप्रकारे शिकून घेतले. सहकार्यांनाही त्याचे प्रशिक्षण देऊन भोर-वेल्हे तालुक्यात श्रमदान व लोकसहभागातून पाणी साठवणुकीच्या फेरोसिमेंट टाक्या बांधण्यासाठी विशेष पुढाकार घेतला आहे.
ग्रामीण भागातील फेरोसिमेंट तंत्रज्ञानाच्या प्रसारासाठी प्रयत्न केल्याबद्दल ज्ञान प्रबोधिनीचाही फेरोसिमेंट सोसायटीतर्फे यावेळी सत्कार करण्यात आला. या सत्काराचा स्वीकार विभागातील सुनीताताई गायकवाड यांनी केला.
कार्यक्रमाचे फेरोसिमेंट सोसायटीचे प्रकल्प समन्वयक गिरीश सांगळे यांनी सूत्रसंचालन केले.