शासनाने ठरवून दिलेल्या नियमाप्रमाणे आम्ही व्यवसाय करू व वेळोवेळी दिलेल्या कडक निर्बंधाचेही पालन करण्यास तयार आहोत, तरी फलटण शहरातील व्यावसायिकांना दुकाने सुरू करण्याबाबत परवानगी द्यावी अथवा एक दिवसाआड व्यवसाय सुरू करण्यास परवानगी द्यावी, अशी मागणी जिल्हाधिकार्यांकडे फलटण येथील व्यापारी व व्यावसायिक यांनी निवेदनाद्वारे केली आहे.
फलटण : शासनाने ठरवून दिलेल्या नियमाप्रमाणे आम्ही व्यवसाय करू व वेळोवेळी दिलेल्या कडक निर्बंधाचेही पालन करण्यास तयार आहोत, तरी फलटण शहरातील व्यावसायिकांना दुकाने सुरू करण्याबाबत परवानगी द्यावी अथवा एक दिवसाआड व्यवसाय सुरू करण्यास परवानगी द्यावी, अशी मागणी जिल्हाधिकार्यांकडे फलटण येथील व्यापारी व व्यावसायिक यांनी निवेदनाद्वारे केली आहे.
फलटण तालुका व्यापारी महासंघ, फलटण तालुका व्यापारी वेलफेअर असोसिएशन व फलटण व्यापारी संघटना, फलटण यांच्यावतीने बुधवारी प्रांताधिकारी डॉ. शिवाजीराव जगताप, मुख्याधिकारी प्रसाद काटकर, तहसीलदार समीर यादव, उपविभागीय पोलीस अधिकारी तानाजी बरडे यांना याबाबतचे निवेदन देण्यात आले.
गेल्या वर्षभरात लावण्यात आलेल्या लॉकडाऊनमुळे फलटण शहरातील बाजारपेठ अधिककाळ बंद राहिल्याने व्यापारी, छोटे व्यावसायिक, हातगाडीवाले, वडापाव, वगैरे तत्सम खाद्यपदार्थ विक्रेते त्याचप्रमाणे या व्यवसायातील नोकरदार, रिक्षा, माल वाहतुकीचे वाहनधारक वगैरे सर्व घटकांचे मोठे नुकसान झाले आहे. आता आदेशानुसार फक्त अत्यावश्यक दुकाने वगळता इतर सर्व व्यवसाय बंद ठेवण्याचे आदेश दिले आहेत. जो आदेश महाराष्ट्र शासनाने काढला आहे. त्यामध्ये राज्यातील आठवड्यात दोन दिवस संपूर्ण व्यापार बंद ठेवायचा आहे. परंतु, आपल्या आदेशानुसार हा संपूर्ण एक महिना बंद ठेवायचा असल्याने त्यामध्ये सवलत देण्याची विनंती करण्यात आली आहे.
व्यापारी, बांधकाम क्षेत्रे, ऑटोमोबाईल गॅरेज विविध व्यवसायांच्या ठिकाणी अनेक कामगार काम करीत असून, त्यांच्या हाताला काम नसल्यामुळे त्यांच्या रोजी रोटीचा प्रश्न निर्माण झाला आहे. बाजारपेठ काही प्रमाणात सुरू झाल्यास त्यांच्या संसाराला थोडाफार हातभार लागेल. यासाठी शहरातील व्यापारी दुकाने, ऑटामोबाईल गॅरेज, बांधकाम क्षेत्रातील कामे, इतर व्यवसाय दैनंदिन ठराविक कालावधीत किंवा एक आड एक दिवस पूर्ण सुरू करण्यास परवानगी देण्याची विनंती निवेदनात केली आहेे.
मे महिन्याची सुट्टी लक्षात घेऊन अनेक व्यापारी यांनी लहान मुलांची खेळणी व अन्य साहित्याची मोठी खरेदी केली, गुढी पाडवा, अक्षय तृतीया सणाच्या पार्श्वभूमीवर चार चाकी/दुचाकी वाहने खरेदी करतात त्याचा मोठा स्टॉक व्यापार्यांनी केला आहे. अनेक बांधकामे पूर्ण करून वरील सणाच्या पार्श्वभूमीवर त्याचा ताबा देण्याची प्रथा असल्याने त्यामध्ये बांधकाम व्यावसायिकांनी केलेली गुंतवणूक वगैरे सर्व व्यापार्यांनी केलेली खरेदी/गुंतवणूक अडकून पडली आहे. सदर व्यापारी यांना वसुलीसाठी तगादा सुरू आहे, दुकाने बंद असली तरी जागा भाडे, वीजबिल, म्युनसिपल कर वगैरे खर्च सुरू आहेत त्यातून व्यापारी मेटाकुटीला आला असल्याने बाजारपेठ सुरू होऊन चलन फिरण्याची आवश्यकता असून त्यातून व्यापारी आणि त्यावर अवलंबून असणार्या अन्य घटकांनाही दिलासा मिळणार असल्याने फलटणची बाजारपेठ त्वरित सुरू करावी, अशी आग्रही मागणी निवेदनात करण्यात आली आहे.
शासनाने ठरवून दिलेल्या नियमाप्रमाणे आम्ही आमचे व्यवसाय करू. त्याकरिता आपण वेळोवेळी दिलेल्या कडक निर्बंधांचेही पालन करण्यास आम्ही तयार आहोत. तरी व्यवसाय/व्यापार सुरू करण्यास परवानगी द्यावी, अशी विनंती फलटण तालुका व्यापारी महासंघ, फलटण तालुका व्यापारी वेलफेअर असोसिएशन व फलटण व्यापारी संघटना, फलटण यांनी निवेदनाद्वारे केली आहे.
निवेदन देताना मंगेश दोशी, प्रमोद निंबाळकर, विशाल पोतेकर वसीम मणेर, प्रमोद जगताप, विकास शहा, शफीक मोदी, दिगंबर कुमठेकर यांच्यासह व्यापारी उपस्थित होते.