वडूज : दरुज (ता. खटाव) येथील ग्रामपंचायतीच्या सरपंचपदी नंदा किसनराव खामकर यांची तर उपसरपंचपदी रोहित चंद्रकांत लावंड यांची बिनविरोध निवड झाली आहे. नंदा या वडूज वकील संघटनेचे माजी अध्यक्ष अ‍ॅड. किसनराव खामकर यांच्या पत्नी आहेत. 

या निवडीकामी लता नवनाथ लावंड, विजया जयकुमार लावंड, सावता बाळू माळी, रमेश खंडू पाटोळे, विठ्ठल विलास आवळे, सारिका तुकाराम आवळे, आशा ज्ञानेश्‍वर मदने या सदस्यांनी सहकार्य केले.

दरुजमधील ग्रामस्थांनी गावपातळीवर गावात सलोख्याचे वातावरण राहावे, हा आदर्श विचार रुजवत सर्व पक्षीय असे महाविकास आघाडी स्थापन करून ग्रामपंचायतीची निवडणूक लढवून एक आदर्श निर्माण केला आहे. 

नऊ सदस्य संख्या असणार्‍या या ग्रामपंचायतीच्या 5 सदस्यांची बिनविरोध तर उर्वरित 4 जगांसाठी झालेल्या निवडणुकीत लढत होऊन गावाने एका विचाराने गावातील सर्व पक्षांच्या प्रमुखांनी निर्माण केलेल्या महाविकास आघाडीच्या उमेदवारांनी यश संपादन केले. गाव जरी लहान असलेतरी निवडणूक जवळ आली की राजकारणचा रंग चढत जाऊन गावातील प्रसंगी पारावरील वातावरण अधिकच तापून माणसांमाणसातील दुरावा व वाढत जाणारे तेढ कमी करण्याचा गावातील जाणकार व तरुणांनी चागला विचार समोर आणून तो सर्वांपर्यंत पोहोचवण्याचा ध्यास व उचललेल्या पावलामुळे गावातील निवडणुकीदरम्यान असणार्‍या वातावरणाला छेद देत यंदाची निवडणूक सर्व विचार धाराच्या लोकांना बरोबर घेऊन अत्यंत शांततेत पार पाडून इतरांसमोर एक आदर्श निर्माण केला आहे. 

सरपंच, उपसरपंच निवड प्रक्रिया बिनविरोध झाल्याबद्दल ग्रामस्थांनी समाधान व्यक्त केले आहे. तर निवडीनंतर बोलताना नूतन सरपंच खामकर व उपसरपंच रोहित लावंड यांनी गावातील ज्येष्ठ नेत्यांच्या मार्गदर्शनाखाली गावामध्ये मोठ्या प्रमाणावर विकासकामे राबविणार असल्याचे सांगितले. तसेच विकासकामात सर्व समाजघटकांना सामावून घेण्याबरोबर तळागाळात विकास प्रक्रिया पोहोचविण्याचा प्रामाणिक प्रयत्न करण्याचे अभिवचनही यावेळी त्यांनी दिले.