फलटण : ‘कोविड-19 या आजाराचा फैलाव दिवसेंदिवस वाढत चाललेला आहे. या पार्श्‍वभूमीवर फलटण तालुक्यातील सर्व प्रशासकीय अधिकार्‍यांनी व ग्रामीण रुग्णालयातील तसेच प्राथमिक आरोग्य केंद्रातील सर्व डॉक्टर व कर्मचार्‍यांनी कोविड रुग्णांना योग्य ते उपचार देण्याकामी व त्यांना सोयी-सुविधा पुरवण्याबाबत कोणत्याही प्रकारचा हलगर्जीपणा करू नये. अन्यथा त्यांच्यावर योग्य ती कारवाई केली जाईल तसेच चांगले काम करणार्‍यांच्या ही पाठीशी ठाम पणे उभे राहणार आहे,’ असे प्रतिपादन महाराष्ट्र विधान परिषदेचे सभापती ना. रामराजे ना. निंबाळकर यांनी केले.
फलटण नगरपरिषदेच्या श्रीमंत रामराजे प्रतापसिंह ना.निंबाळकर सभागृहामध्ये आयोजित केलेल्या कोरोना आढावा बैठकीत ते बोलत होते.
यावेळी फलटण-कोरेगावचे आ. दीपक चव्हाण, फलटणचे उपविभागीय अधिकारी शिवाजीराव जगताप, प्रभारी तहसीलदार आर. सी. पाटील, फलटण नगरपरिषदेचे मुख्याधिकारी प्रसाद काटकर, ग्रामीण उपजिल्हा रुग्णालयाचे डॉ. व्यंकट धवण, डॉ. सुभाष गायकवाड, डॉ. विक्रांत पोटे, डॉ. शीतल सोनवलकर, तसेच फलटण तालुक्यातील 7  प्राथमिक आरोग्य केंद्रांचे डॉक्टर्स उपस्थित होते.  विशेष करून या आढावा बैठकीसाठी सातारा जिल्हा परिषदेचे माजी अध्यक्ष संजीवराजे ना. निंबाळकर हे ऑनलाईन उपस्थित होते.
ना. रामराजे म्हणाले, ‘उपजिल्हा रुग्णालयाने कोरोना चाचणी घेण्याची वेळ सकाळी 8 ते संध्याकाळी 7 पर्यंत वाढवण्यात यावी व जास्तीत जास्त चाचण्या घ्याव्यात. त्याचबरोबर उपजिल्हा रुग्णालयाने तयार केलेल्या 25 बेडच्या हॉस्पिटलमध्ये ऑक्सिजनचा पुरवठा करून त्यामधील 6 बेडला आयसीयू सुविधा उपलब्ध करून द्यावी. व सोमवारपर्यंत ते हॉस्पिटल कार्यान्वित करावे तसेच दुर्दैवाने एखादा कोरोना झालेला रुग्ण दगावल्यास शासनाच्या मार्गदर्शक सूचनांचे पालन करून त्या रुग्णाचा मृतदेह नगरपरिषदेच्या ताब्यामध्ये द्यावा.’
फलटण तालुक्यामध्ये तरडगाव, साखरवाडी, राजाळे, गिरवीसह तसेच अनेक ठिकाणी कार्यान्वित असलेली प्राथमिक आरोग्य केंद्रातील डॉक्टर व त्यांच्या स्टाफने त्याठिकाणी कोरोना टेस्ट घ्याव्यात व पॉझिटिव्ह आलेल्या रुग्णांना तिथेच उपचार देण्यात यावेत. त्यांच्या परिसरातील भागांचा आशा वर्कर्समार्फत सर्व्हे करून कोणत्याही परिस्थितीमध्ये रुग्णांची हेळसांड न करता प्रामाणिकपणे काम करावे. गेली कित्येक वर्षे आपण या ठिकाणी काम करीत आहात, आपणाला कोणत्याही स्वरूपाचा फलटणकरांनी त्रास दिलेला नाही. आज फलटण शहरातील व तालुक्यातील जनतेसाठी प्रामाणिक काम करण्याचे तुमचे दिवस आहेत. त्यासाठी आपण प्रामाणिकपणे या काळामध्ये काम करणे गरजेचे आहे. त्याचबरोबर फलटण नगरपरिषदेने कार्यान्वित केलेल्या रुग्णालयामध्ये ही काही सोयी-सुविधा पुरविणार असून, तेथे लवकरच  पूर्णवेळ डॉक्टर उपलब्ध करून दिले जातील व त्या ठिकाणी आवश्यक असणार्‍या मशिनरी त्याचबरोबर कोरोना रुग्णासाठी गरजेची असणारे औषधेही पुरवली जातील.
फलटण शहरातील व फलटण तालुक्यातील खासगी ओपीडी करणार्‍या डॉक्टरांनी सुद्धा आपल्या हॉस्पिटलमधील काही भाग कोरोना रुग्णांसाठी ठेवावा व शासनाने घालून दिलेल्या नियमाप्रमाणे त्यांच्याकडून फी आकारून त्यांना सेवा देण्याचे काम करावे तसेच आपल्या हॉस्पिटलमधील  कंपल्सरी काही बेड सुद्धा आयसोलेशनसाठी ठेवणे गरजेचे असल्याचे शेवटी श्रीमंत रामराजे म्हणाले.
प्रांताधिकारी शिवाजीराव जगताप म्हणाले, ‘सप्टेंबरअखेर फलटण तालुक्यामध्ये चार हजार रुग्ण होतील, त्यादृष्टीने प्रशासन कामाला लागले असल्याचे रामराजे यांच्या निदर्शनास आणले.’
या आढावा बैठकीसाठी फलटण शहरातील व फलटण तालुक्यातील काही डॉक्टर्स देखील उपस्थित होते.