मराठी राजभाषा दिन व थोर साहित्यिक वि. वा. शिरवाडकर उर्फ कुसुमाग्रज यांच्या जयंतीनिमित्त सातारा येथील रयत शिक्षण संस्थेच्या सावित्रीबाई फुले महिला महाविद्यालयात ग्रंथालय विभागाच्या वतीने दि. 27 फेब्रुवारी 2021 रोजी सकाळी दहा वाजता ग्रंथ प्रदर्शनाचे आयोजन करण्यात आल्याची माहिती ग्रंथालय शास्त्र विभागाच्या प्रमुख प्रा. आशा जिरगे यांनी दिली.
सातारा : मराठी राजभाषा दिन व थोर साहित्यिक वि. वा. शिरवाडकर उर्फ कुसुमाग्रज यांच्या जयंतीनिमित्त सातारा येथील रयत शिक्षण संस्थेच्या सावित्रीबाई फुले महिला महाविद्यालयात ग्रंथालय विभागाच्या वतीने दि. 27 फेब्रुवारी 2021 रोजी सकाळी दहा वाजता ग्रंथ प्रदर्शनाचे आयोजन करण्यात आल्याची माहिती ग्रंथालय शास्त्र विभागाच्या प्रमुख प्रा. आशा जिरगे यांनी दिली.
ग्रंथ प्रदर्शनाचे उद्घाटन सुप्रसिद्ध वक्ते व ज्येष्ठ साहित्यिक प्रा. श्रीधर साळुंखे यांच्या हस्ते करण्यात येणार असून, कार्यक्रमाच्या अध्यक्षस्थानी रयत शिक्षण संस्थेचे ऑडिटर व महाविद्यालयाचे प्राचार्य डॉ. शिवलिंग मेनकुदळे असतील. कला शाखेच्या उपप्राचार्या डॉ. सुनीता घार्गे व वाणिज्य शाखेचे उपप्राचार्य डॉ. तुळशीराम महानवर यांची प्रमुख उपस्थिती असेल.
मराठी भाषेतील समृद्ध ज्ञानपरंपरेचा परिचय विद्यार्थ्यांना व्हावा, या उद्देशाने सदर ग्रंथ प्रदर्शन घेण्यात आले आहे. प्रदर्शनात दुर्मीळ ग्रंथांसह विश्वकोश, ज्ञानकोश, भारतीय संस्कृतिकोश, भारतीय सरिताकोश, विज्ञान कोश, मराठी साहित्य इतिहासाचे खंड, तत्त्वज्ञान, चरित्रे, आत्मचरित्रे, प्रवासवर्णने, कथा-कादंबरी अशा सर्व साहित्य प्रकारातील ग्रंथ विद्यार्थ्यांना पाहता येतील.
तरी सातारा परिसरातील विद्यार्थी व ग्रंथप्रेमींनी ग्रंथ प्रदर्शनाचा लाभ घ्यावा, असे आवाहन ग्रंथालय विभागप्रमुख प्रा. आशा जिरगे व ग्रंथालय सहायक शशिकांत घोरपडे यांनी केले आहे.