सातारा : ‘अनुवादक हे वेगाने विस्तारणारे करिअर आहे. ज्या विद्यार्थ्यांचे भाषेवर प्रभुत्व आहे आणि ज्यांना करिअरच्या वेगळ्या वाटेवर जायचे असेल त्यांनी ‘अनुवाद’ या क्षेत्राचा नक्कीच विचार करावा. त्यात अर्थार्जन तर होईलच; परंतु वेगवेगळ्या विभाग, प्रदेश, देशांचा सांस्कृतिक, सामाजिक, शैक्षणिक असा अभ्यासही त्यातून करता येईल,’ असे प्रतिपादन महाराष्ट्र पत्रकार कल्याण निधीचे कार्यकारी विश्‍वस्त विजय मांडके यांनी केले.

तळमावले येथील काकासाहेब चव्हाण कॉलेजमध्ये कवी कुसुमाग्रज जयंती दिनी मराठी भाषा दिनाचे औचित्य साधून मराठी विभागाच्या वतीने अग्रणी महाविद्यालय योजनेंतर्गत  ‘अनुवादक करिअरची नवी संधी’ या विषयावर एक दिवसीय कार्यशाळा संपन्न झाली. याप्रसंगी ते बोलत होते. 

अध्यक्षस्थानी महाविद्यालयाचे प्राचार्य डॉ. अरुण गाडे होते. याप्रसंगी लोकरंग मंच साताराचे अध्यक्ष सुजित शेख उपस्थित होते.

विजय मांडके म्हणाले, ‘जगातील अनेक देशांमधून मराठीचा भाषाभ्यास केला जात आहे. सध्याच्या माहिती तंत्रज्ञान युगात संपूर्ण जग इंटरनेटने जोडले आहे. अशावेळी आपणाला अधिक भाषा अवगत असणे ही काळाची गरज आहे. बदलत्या काळाबरोबर मराठीतून अनेक नवनवीन संधी उपलब्ध झाल्या आहेत. या बदलाच्या प्रवाहात घरबसल्या अर्थार्जनाच्या अनेक गोष्टी निर्माण झाल्या आहेत. साहित्य, अनुवाद, भाषांतर, जाहिरात लेखन, चित्रपट, आकाशवाणी, विविध चॅनेल्स, वर्तमानपत्रे, नियतकालिके अशा जीवनातील सर्वच क्षेत्रांत अनुवादाची निकड निर्माण झाली आहे.’

प्राचार्य डॉ. अरुण गाडे म्हणाले, ‘आजही आपण मराठी भाषेत बोलताना लाजतो. उच्चभ्रूपणाच्या देखाव्यासाठी मुद्दामहून इंग्रजी बोलण्याचा आव आणतो. मातृभाषेच्या  समृद्धीसाठी हे योग्य नाही. तसेच विद्यार्थ्यांनी पारंपरिक करिअरचा विचार न करता काळाची पावले ओळखून करिअर निवड करावी. पदवीतून केवळ अर्थार्जनासाठी नव्हे तर चारित्र्यसंपन्न जीवन आचरण घडावे.’ 

यावेळी ‘लाभले आम्हास भाग्य बोलतो मराठी’ या कविता विशेषांकाचे प्रकाशन करण्यात आले. 

यावेळी लालबहादूर शास्त्री कॉलेज, सातारा माजी विद्यार्थी संघाचे अध्यक्ष ज्येष्ठ पत्रकार विजय मांडके यांच्या हस्ते महाविद्यालयाचे प्राचार्य डॉ. अरुण गाडे  यांचा शाल व बुके देऊन सत्कार करण्यात आला.

कार्यशाळेच्या यशस्वितेसाठी सर्व गुरुदेव कार्यकर्त्यांनी परिश्रम घेतले. 
यावेळी गुरुदेव कार्यकर्ते, विद्यार्थी- विद्यार्थिनी बहुसंख्येने उपस्थित होते

प्रा. महेश चव्हाण यांनी प्रास्ताविक केले. डॉ. गवराम पोटे यांनी सूत्रसंचालन केले. प्रा. सचिन पुजारी यांनी आभार मानले.