सातारा जिल्ह्यात दिवसेंदिवस कोरोनाचे रुग्ण वाढत आहेत. सद्य:स्थितीत जिल्ह्यातील अत्यावशक सेवेतील पोलिसांना कोरोना विषाणूचा प्रादुर्भाव मोठ्या प्रमाणावर होत आहे. कोरोनाचा प्रादुर्भाव रोखण्यासाठी राज्य सरकार तसेच जिल्हा प्रशासनाकडून अनेक प्रयत्न केले जात आहेत.
पुसेगाव : सातारा जिल्ह्यात दिवसेंदिवस कोरोनाचे रुग्ण वाढत आहेत. सद्य:स्थितीत जिल्ह्यातील अत्यावशक सेवेतील पोलिसांना कोरोना विषाणूचा प्रादुर्भाव मोठ्या प्रमाणावर होत आहे. कोरोनाचा प्रादुर्भाव रोखण्यासाठी राज्य सरकार तसेच जिल्हा प्रशासनाकडून अनेक प्रयत्न केले जात आहेत. याच पार्श्‍वभूमीवर कोरोनाच्या महामारीत आपल्या जीवाची पर्वा न करता काम करणार्‍या सातारा जिल्ह्यातील कोरोनाबाधित पोलिसांच्या उपचारासाठी स्वतंत्र रुग्णालय तयार केलं गेलं आहे. या कोविड रुग्णालयासाठी पुसेगाव, ता. खटाव येथील सेवागिरी महाराज देवस्थान ट्रस्टच्यावतीने ईसीजी मॉनिटर सेटअप भेट देण्यात आला.
कोरोनाचा संसर्ग टाळण्यासाठी देवस्थान ट्रस्ट पुसेगावसह परिसरात विविध उपक्रम राबवत आहे. दरम्यान, पोलीस बांधव कोरोनाच्या युद्धजन्य परिस्थितीत एखाद्या वॉरियर्स प्रमाणे कार्य करत असून, त्यांच्यासाठी उभारण्यात आलेल्या कोविड रुग्णालयासाठी ट्रस्टने आपले कर्तव्य समजून ईसीजी मॉनिटर सेटअप भेट दिल्याचे यावेळी चेअरमन मोहनराव जाधव यांनी सांगितले.
याप्रसंगी मठाधिपती श्रीमहंत सुंदरगिरी महाराज, चेअरमन मोहनराव जाधव, डॉ. सुरेश जाधव, पुसेगाव पोलीस ठाण्याचे सपोनि विश्‍वजित घोडके, विश्‍वस्त रणधीर जाधव, योगेश देशमुख, प्रताप जाधव, सुरेशशेठ जाधव, लक्ष्मण जाधव, शंकर जाधव, बाळासाहेब कुलकर्णी, डॉ. अंबादास कदम, विशाल माने आदी उपस्थित होते.
कोरोनाच्या महामारीत सर्व पोलीस बांधव देवासारखे कार्य करत आहेत. या कठीण काळात पोलिसांनी दाखवलेला उत्साह अतुलनीय आहे. यासाठी त्यांचे मानावे तेवढे आभार कमीच आहेत. त्यांच्या कार्याला सलाम करण्यासाठी आपले कर्तव्य समजून ट्रस्टच्यावतीने कोविड रुग्णालयासाठी ईसीजी मॉनिटर सेटअप भेट देण्यात आले आहेत.
- डॉ. सुरेश जाधव, विश्‍वस्त तथा अध्यक्ष सातारा जिल्हा काँग्रेस कमिटी
