कुडाळ : कुडाळ (ता. जावली) येथे पोलीस ठाण्यापासून जवळच उभ्या असणार्‍या उसाच्या ट्रॉलीला ओमनी कारने धडक देऊन झालेल्या अपघातात चारजण जखमी झाल्याची घटना घडली. रविवारी पहाटे हा अपघात झाला.

याबाबत अधिक माहिती अशी की, मेढा येथील भाजीपाला व्यापारी आनंद ढेबे हे होलसेल भाजीपाला आणण्यासाठी ओमनी कार क्र. (एमएच 08 आर 0940) मधून रविवारी पहाटे वाईकडे निघाले होते. दरम्यान, कुडाळ पोलीस ठाण्यापासून जवळ रस्त्याच्या कडेला उसाने भरलेली ट्रॅक्टर-ट्रॉली उभी होती. या ट्रॉलीला ओमनीने जोरदार धडक दिली.ही धडक एवढी जोरदार होती की, या धडकेच्या आवाजाने तसेच गाडीतील लोकांच्या किंकाळ्या ऐकून परिसरातील लोक झोपेतून जागे होऊन घटनास्थळी धावले. 

कुडाळ पोलीस ठाण्याचे सहायक पोलीस उपनिरीक्षक ओव्हाळ तसेच कर्मचारी तातडीने घटनास्थळी दाखल झाले. त्यांनी या ओमनीत अडकलेल्या लोकांना बाहेर काढण्यासाठी प्रयत्न केला. ओमनी गाडी उसाच्या ट्रालीत एवढी अडकली होती की ती काढण्यासाठी जेसीबीची मदत घ्यावी लागली. सुदैवाने कोणतीही जीवितहानी झाली नाही. 

या अपघातात जखमी झालेल्या चार जणांना उपचारासाठी सातारा येथे पाठवण्यात आले आहे.