मुंबई २१ ऑगस्ट, २०२६: राज्यातील साहसी पर्यटनाला चालना देण्याबरोबरच पर्यटकांच्या सुरक्षिततेला

प्रथम प्राधान्य देण्याच्या उद्देशाने महाराष्ट्र शासनाच्या पर्यटन विभागाद्वारे साहसी पर्यटन धोरण

राबविण्यात येत आहे. जमीन, हवा, पाणी या तीनही प्रकारातील साहसी पर्यटन उपक्रमांना प्रोत्साहन

देण्यासाठी शासनाने एक पाऊल पुढे टाकले आहे. साहसी पर्यटन आयोजक, संस्था, रिसॉर्टस् तसेच संबंधित

सेवा पुरवठादारांनी या धोरणाचा लाभ घ्यावा आणि धोरणामध्ये नमूद केलेल्या सुरक्षा निकषांचे पालन

करावे, असे आवाहन पर्यटन विभागाद्वारे करण्यात आले आहे.

साहसी पर्यटन क्षेत्रामध्ये सुरक्षित, सुनियोजित आणि जबाबदार पर्यटन व्यवस्था निर्माण करणे हा या

धोरणाचा मुख्य उद्देश आहे. या धोरणाअंतर्गत साहसी पर्यटन उपक्रमांसाठी नोंदणी प्रक्रिया व अधिकृत

प्रमाणपत्राची सुविधा उपलब्ध करून देण्यात आली आहे. तसेच पर्यटकांमध्ये सुरक्षिततेबाबत विश्वास

निर्माण होण्यास मदत होत आहे.

पर्यटन संचालनालयाचे संचालक श्री. विकास पानसरे (भा.प्र.से.) म्हणाले, "साहसी पर्यटन धोरण हे

राज्यातील पर्यटन विकासाला नवी दिशा देणारे महत्त्वपूर्ण धोरण आहे. सदर धोरणाला राज्यभरातून

चांगला प्रतिसाद मिळत आहे. तसेच साहसी पर्यटन क्षेत्रात नियोजनबद्ध आणि सुरक्षित पद्धतीने विविध

उपक्रम राबविले जात आहेत. यामुळे पर्यटकांचा साहसी उपक्रमाबाबत विश्वास अधिक दृढ झाला आहे.

त्याचबरोबरीने स्थानिक स्तरावर रोजगाराच्या नव्या संधीही निर्माण होत आहेत. साहसी पर्यटन क्षेत्राशी

संबंधित आयोजक, संस्था आणि सेवा पुरवठादारांनी शासनाच्या धोरणाचा लाभ घेत अधिकाधिक उपक्रम

अधिकृतपणे नोंदणीकृत करावेत. पर्यटकांच्या सुरक्षिततेला प्रथम प्राधान्य देत महाराष्ट्राला साहसी पर्यटन

क्षेत्रामध्ये अग्रगण्य राज्य बनविण्यासाठी शासन कटिबद्ध आहे."

साहसी पर्यटन धोरणाचा लाभ वैयक्तिक आयोजक, भागीदारी संस्था, कंपन्या, ना-नफा तत्त्वावरील संस्था,

धर्मादाय संस्था, क्लब, रिसॉर्ट्स, साहसी पर्यटन कॅम्प्स, प्रशिक्षण संस्था तसेच साहसी पर्यटनाशी संबंधित

सेवा पुरवठादारांना घेता येतो. या धोरणामध्ये पर्यटकांच्या सुरक्षिततेसाठी सविस्तर नियमावली तयार

करण्यात आली आहे. आवश्यक परवानग्या, प्रशिक्षित मार्गदर्शक, दर्जेदार उपकरणे, प्राथमिक उपचार केंद्र,

सुरक्षा जाळ्या, दिशादर्शक फलक, टेहळणी मनोरे, सायरन, अग्निसुरक्षा आणि आपत्कालीन बचाव

व्यवस्थेसारख्या सुविधा बंधनकारक करण्यात आल्या आहेत.

राज्यातील गिर्यारोहण, पॅरासेलिंग, स्कुबा डायव्हिंग, बंजी जंपिंग आणि इतर साहसी पर्यटन उपक्रमांना या

धोरणामुळे मोठी चालना मिळत आहे. पर्यटकांना सुरक्षित वातावरणात दर्जेदार सुविधा उपलब्ध

होण्याबरोबरच स्थानिक तरुणांसाठी रोजगार आणि स्वयंरोजगाराच्या नव्या संधी निर्माण होत आहेत.

साहसी पर्यटन क्षेत्रात कार्यरत सर्व आयोजक, संस्था आणि इच्छुक उद्योजकांना सदर धोरणाबाबत माहिती

आणि नोंदणी www.maharashtratourism.gov.in या पर्यटन विभागाच्या अधिकृत संकेतस्थळावर

करता येईल. संबंधितांनी सदर धोरणाचा लाभ घ्यावा आणि सुरक्षित, जबाबदार व शाश्वत साहसी

पर्यटनाच्या उभारणीमध्ये सक्रिय सहभाग नोंदवावा, असे आवाहन पर्यटन विभागाद्वारे करण्यात आले आहे.