मसूर : कराड तालुक्यातील हेळगाव येथे वाटेच्या वादातून झालेल्या भांडणाचे रूपांतर हाणामारीत झाले. त्यामध्ये कोयता, कुराड, दांडके याचा वापर झाल्याने एका युवकाच्या डोक्यात कुराडीने वार झाल्याने त्याचा हकनाक बळी गेला. तर या घटनेत आणखी एकाला डोक्याला मार लागल्याने गंभीर जखमी झाला असून त्याच्यावर कराड येथील कृष्णा रुग्णालयात उपचार सुरू आहेत. ही घटना रविवारी सकाळी नऊच्या सुमारास घडली. गावात जाणाऱ्या मुख्य रस्त्यावरच ही घटना घडली मर्डर झालेल्या युवकाचे नाव सुरज भरत सूर्यवंशी वय 22 वर्ष असे आहे. गंभीर जखमी युवकाचे नाव सचिन रामचंद्र सूर्यवंशी असे आहे. या घटनेच्या परस्पर तक्रारी मसूर पोलीस स्टेशन मध्ये दाखल झाल्या आहेत. हेळगाव गावच्या इतिहासात प्रथमच एवढी भयानक आणि मोठी घटना घडल्याने अख्खा गाव सुन्न झाला आहे.

याबाबत घटनास्थळावरून मिळालेल्या माहितीनुसार शनिवारी रात्री सूर्यवंशी कुटुंबातील उत्तम उर्फ श्रीमंत सूर्यवंशी आणि धीरज सूर्यवंशी या दोघांमध्ये वाद झाला होता. त्यापैकी धीरज सूर्यवंशी यांनी पोलीस स्टेशनला तक्रारही नोंदवली होती त्यानंतर पोलिसांनी दोघांनाही समक्ष बोलावून सूचना दिल्या होत्या. मात्र भांडणाचा राग मनात धरून दुसऱ्या दिवशी रविवारी या भांडणाचे मोठ्या हाणामारीत रूपांतर झाले या घटनेत एकाचा हकनाक बळी गेला एक गंभीर जखमी असून यामध्ये सात ते आठ जण जखमी झाले आहेत. जखमीवर कृष्णा रुग्णालय व खाजगी रुग्णालयात उपचार सुरू आहेत.

दरम्यान घटनास्थळी पोलिसांचा फौज फाटा दिवसभर दिसून आला. या ठिकाणी डॉग स्काँड बोलवण्यात आले होते. दरम्यान उपविभागीय पोलीस अधिकारी राजश्री पाटील यांनी मसूर पोलीस स्टेशनला भेट देऊन घटनेची सविस्तर माहिती घेतली