शहरातील मोती चौक परिसरात शनिवारी रात्री डॉल्बी सिस्टीमवर करण्यात आलेल्या पोलिसांच्या कारवाईनंतर काही काळ तणावपूर्ण वातावरण निर्माण झाले. कारवाईला विरोध दर्शवत रिपब्लिकन सेना संघटनेचे पदाधिकारी, कार्यकर्ते तसेच संबंधित सार्वजनिक मंडळाच्या सदस्यांनी रस्त्यावर ठिय्या आंदोलन छेडले. प्रशासनाच्या भूमिकेविरोधात जोरदार घोषणाबाजी करण्यात आल्याने परिसरात मोठी गर्दी झाली होती.

लोकशाहीर अण्णाभाऊ साठे यांच्या जयंतीनिमित्त साताऱ्यात रॅलीचे आयोजन करण्यात आले होते या पार्श्वभूमीवर ध्वनीप्रदूषण नियंत्रण नियमांची अंमलबजावणी करण्यासाठी पोलिसांकडून शहरातील विविध भागांत तपासणी मोहीम सुरू होती. त्याच दरम्यान मोती चौक येथे डॉल्बी सिस्टीमवर कारवाई करण्यात आली. या कारवाईवर आंदोलकांनी आक्षेप घेत प्रशासन निवडक पद्धतीने कारवाई करत असल्याचा आरोप केला.

 कारवाईदरम्यान पोलिस आणि कार्यकर्त्यांमध्ये शाब्दिक वाद झाला. त्यानंतर संतप्त झालेल्या आंदोलकांनी रस्त्यावर बसून ठिय्या आंदोलन सुरू केले. प्रशासनाविरोधात घोषणाबाजी केल्यामुळे काही काळ वाहतुकीची गती मंदावली. नागरिकांचीही मोठी गर्दी झाल्याने पोलिसांनी तत्काळ अतिरिक्त बंदोबस्त तैनात करून परिस्थिती नियंत्रणात ठेवण्याचा प्रयत्न केला.

घटनेची माहिती मिळाल्यानंतर वरिष्ठ पोलीस अधिकारी घटनास्थळी पोहोचले. त्यांनी आंदोलनकर्त्यांशी चर्चा करून त्यांचे म्हणणे ऐकून घेतले तसेच कायदा व सुव्यवस्था राखण्याचे आवाहन केले. चर्चेनंतर आंदोलन शांत झाले आणि परिस्थिती पूर्ववत झाली. या संपूर्ण घटनेत कोणताही अनुचित प्रकार घडला नसून पोलिसांनी परिसरात आवश्यक खबरदारी कायम ठेवली आहे.