वाई : पुणे-सातारा महामार्गावर मौजे कवठे (ता. वाई) हद्दीत एका धावत्या गाडीला अडवून लोखंडी हत्याराचा धाक दाखवत तब्बल १ कोटी ११ लाख ८६ हजार ५ रुपयांचा ऐंशी लाख नव्हे तर सव्वा कोटी जवळपासचा मुद्देमाल लुटल्याची गंभीर घटना समोर आली आहे. भुईंज पोलीस ठाण्यात याप्रकरणी BNS कलमान्वये दरोड्याचा गुन्हा दाखल करण्यात आला असून, सात अनोळखी संशयितांचा शोध सुरू आहे. पोलिसांकडून मिळालेल्या माहितीनुसार, फिर्यादी विजय विलास पवार (वय ३६, रा. राजारामपुरी, कोल्हापूर) हे आपल्या गाडीतून प्रवास करत होते. १६ ऑक्टोबर २०२६ रोजी सकाळी ७ वाजण्याच्या सुमारास पुणे ते सातारा जाणार्‍या हायवे रोडवरील लेन क्रमांक ३ वर, कवठे ब्रिजच्या अलीकडे हा प्रकार घडला. फिर्यादीची गाडी चालत असताना अचानक एका युनिकॉन दुचाकीवरील तिघा जणांनी त्यांची गाडी अडवली. त्यानंतर त्या इसमांनी फिर्यादीला धक्काबुक्की व दमदाटी केली. तसेच लोखंडी धारदार हत्याराचा धाक दाखवून त्यांना भीती घातली. पाठोपाठ आणखी दोन दुचाकींवरून चार अनोळखी इसम तिथे आले. अशा एकूण सात जणांनी मिळून फिर्यादीच्या गाडीची झडती घेतली. गाडीतील पांढऱ्या रंगाच्या पोत्यामध्ये ठेवलेले ६३५.५१ ग्रॅम वजनाचे सोने आणि १० किलो ३६६ ग्रॅम वजनाची चांदी, असा एकूण १,११,८६,००५ रुपये किमतीचा ऐवज हे सातही दरोडेखोर बळजबरीने लुटून पसार झाले. दिवसाढवळ्या घडलेल्या या धाडसी दरोड्याची माहिती मिळताच सातारा पोलीस दलात खळबळ उडाली. सातारा जिल्ह्याचे पोलीस अधीक्षक मा. निखिल पिंगळे, अपर पोलीस अधीक्षक मा. वैशाली कडूकर, उपविभागीय पोलीस अधिकारी (सातारा विभाग) मा. विपुल पाटील, उपविभागीय पोलीस अधिकारी (वाई विभाग) मा. सुनील साळुंखे, स्थानिक गुन्हे शाखेचे पोलीस निरीक्षक मा. विश्वजीत घोडके, भुईंज पोलीस ठाण्याचे सहायक पोलीस निरीक्षक मा. पृथ्वीराज ताटे आदी वरिष्ठ अधिकाऱ्यांनी तातडीने घटनास्थळाला भेट देऊन पाहणी केली. याप्रकरणी भुईंज पोलीस ठाण्यात गु.र.नं. ३२०/२०२६ नुसार BNS कलम ३१०(२), १२६ अन्वये दरोड्याचा गुन्हा दाखल करण्यात आला आहे. गुन्ह्याचा पुढील तपास मा. पुनम झगडे (परिविक्षाधीन पोलीस उपअधीक्षक तथा तपासी अंमलदार, भुईंज पोलीस ठाणे) यांच्याकडे वर्ग करण्यात आला असून, आरोपींच्या शोधासाठी पोलिसांनी वेगाने चक्रे फिरवली आहेत.