कराड, दि. 1 : सर्वसामान्य नागरिकांकडून नियमांचे उल्लंघन झाल्यास तातडीने कारवाई करणाऱ्या पोलिसांकडूनच नियमांना हरताळ फासला जात असेल, तर नागरिकांनी कोणता आदर्श घ्यायचा? असा सवाल सध्या कराडमध्ये उपस्थित होत आहे. कराड तालुका पोलीस ठाण्यात कर्तव्य बजावणाऱ्या एका महिला पोलीस कर्मचाऱ्याने कोल्हापूर नाका ते नांदलापूरदरम्यानच्या उड्डाणपुलावर रात्रीच्या वेळी नव्या कोऱ्या कारसमोर वाढदिवस साजरा केल्याची चित्रफीत सोशल मीडियावर व्हायरल झाली आहे. या झगमगाटी सेलिब्रेशनमुळे पोलीस दलाच्या कार्यपद्धतीवरच प्रश्नचिन्ह निर्माण झाले असून, शहरात या प्रकाराची जोरदार चर्चा सुरू आहे.

कराड शहरातील कोल्हापूर नाका ते नांदलापूरदरम्यानचा सुमारे साडेतीन किलोमीटर लांबीचा एकखांबी उड्डाणपूल अलीकडच्या काळात विविध कारणांनी चर्चेत आहे. पुलाचे काम पूर्ण झाल्यानंतर टप्प्याटप्प्याने तो वाहतुकीसाठी खुला करण्यात आला. मात्र, पुलावरील प्रशस्त रस्ता आणि वाहनांच्या वेगावर नियंत्रण ठेवणाऱ्या उपाययोजनांचा अभाव यामुळे अनेक वाहनचालकांकडून वेगमर्यादेचे उल्लंघन होत असल्याचे चित्र आहे. काही दिवसांपूर्वी याच पुलावर भरधाव कारच्या भीषण अपघातात चार युवकांचा जागीच मृत्यू झाला होता. या दुर्घटनेने संपूर्ण परिसर हादरला होता. त्यानंतर उड्डाणपुलावरील वाहतूक सुरक्षिततेचा प्रश्न ऐरणीवर आला होता.

या पार्श्वभूमीवर प्रशासनाकडून वेगनियंत्रण आणि अपघात रोखण्यासाठी ठोस उपाययोजना केल्या जातील, अशी अपेक्षा नागरिकांना होती. मात्र, त्याच उड्डाणपुलावर महिला पोलीस कर्मचाऱ्याने वाढदिवस आणि नव्या कारच्या आगमनाचे सेलिब्रेशन केल्याची चित्रफीत समोर आल्याने नव्या वादाला तोंड फुटले आहे.

व्हायरल झालेल्या चित्रफितीत वाढदिवसाच्या सेलिब्रेशनचा खास थाट पाहायला मिळतो. उड्डाणपुलावरील पथदिव्यांच्या प्रकाशात उभी असलेली काळ्या रंगाची नवी कोरी कार, कारसमोरील केक, हातात फुलांचा बुके, कारच्या बोनेटवर बसलेली महिला पोलीस आणि ‌‘पायरों गन‌’मधून उडणाऱ्या सोनेरी ठिणग्या, अशा आकर्षक पद्धतीने हा वाढदिवस साजरा करण्यात आल्याचे दिसत आहे. या संपूर्ण सेलिब्रेशनचे चित्रीकरण करून त्याची रील तयार करण्यात आल्याचेही चित्रफितीतून स्पष्ट होते.

एकीकडे याच उड्डाणपुलावर झालेल्या भीषण अपघातामुळे नागरिकांच्या मनात भीतीचे वातावरण आहे. तर दुसरीकडे महामार्गावर वाहन उभे करून अशा प्रकारे सेलिब्रेशन करण्याचा प्रकार समोर आल्याने नागरिकांकडून आश्चर्य व्यक्त होत आहे. सार्वजनिक रस्त्यावर वाहन उभे करून अशा पद्धतीने वाढदिवस साजरा करताना वाहतुकीला अडथळा निर्माण होण्याबरोबरच अपघाताचा धोकाही संभवतो. त्यामुळे संबंधित प्रकार गंभीर असल्याची भावना व्यक्त होत आहे.

विशेष म्हणजे, कराड शहरात रस्त्यावर वाढदिवस साजरा करून वाहतुकीला अडथळा निर्माण करणाऱ्यांविरोधात यापूर्वी कराड शहर पोलीस ठाण्यात अनेक गुन्हे दाखल झाले आहेत. सर्वसामान्य नागरिकांच्या अशा प्रकारांवर कारवाई होत असताना पोलीस दलातीलच कर्मचाऱ्याच्या कृतीकडे दुर्लक्ष होणार का? संबंधित प्रकार पोलिसांच्या निदर्शनास आला नाही की जाणीवपूर्वक दुर्लक्ष करण्यात आले, असा प्रश्नही उपस्थित केला जात आहे.

कायद्याचे पालन करण्याची आणि इतरांकडून करवून घेण्याची जबाबदारी असलेल्या पोलीस कर्मचाऱ्यांनीच नियमांचे भान राखले नाही, तर नागरिकांमध्ये काय संदेश जाणार? कराड शहरात कायदा व सुव्यवस्था राखण्यासाठी पोलिसांनी सर्वप्रथम आपल्या दलातील शिस्त आणि कार्यपद्धती सुधारण्याची गरज असल्याची प्रतिक्रिया नागरिकांमधून व्यक्त होत आहे.