मान्यवरांच्या उपस्थितीत समाज आरती संपन्न झाल्यानंतर माऊलींचा पालखी सोहळा बरड येथील पालखी तळावर एक दिवसाच्या मुक्कामासाठी विसावला, यानंतर बरड व पंचक्रोशीतील भाविकांनी माऊलींच्या दर्शनासाठी मोठ्या रांगा लावल्या. 

     संत शिरोमणी ज्ञानेश्वर माऊली पालखी सोहळ्याचे स्वागत व वारकरी, भाविकांची तन, मन, धनाने सेवा करुन फलटणकरांनी तृप्त भावनेने माऊलींना आज शनिवारी सकाळी भावपुर्ण निरोप दिला. सकाळी सहा वाजता फलटण येथील प्रशस्त पालखीतळावरून (विमान तळ) येथील एक दिवसांचा मुक्काम आटोपून सोहळ्याने बरडकडे प्रस्थान केले. सोहळा विडणी येथे सकाळच्या न्याहरी साठी थांबला.त्यावेळी पंचायत समिती सदस्य सचिन अभंग, सरपंच सागर अभंग, उपसरपंच मनिषा नाळे, श्रीराम कारखान्याचे चेअरमन डॉ. बाळासाहेब शेंडे, विलास अभंग, ग्रामीणचे पोलिस निरिक्षक राजकुमार भुजबळ, पोलिस पाटील सौ. शीतल नेरकर, धनाजी नेरकर, ग्रामविकास अधिकारी अंकुश टेंबरे, मंडल अधिकारी कैलास जाधव, तलाठी दत्तात्रय धुमाळ आदी मान्यवरांनी सोहळ्याचे स्वागत केले. विडणी येथे राजेंद्र पवार व अर्चना पवार आणि महेंद्र पवार व प्रिती पवार या दाम्पत्यांच्या हस्ते मानाची पूजा, आरती करुन माउलींना नैवेद्य दाखविण्यात आला. सुमारे तासभराचा विसावा घेऊन हा सोहळा दुपारच्या भोजनासाठी पिंप्रदकडे मार्गस्थ झाला. पिंप्रद येथे या सोहळ्याचे स्वागत सरपंच स्वाती घनवट, उपसरपंच सागर बोराटे, पोलिस पाटील सुनिल बोराटे यांच्यासह ग्रामस्थांनी केले. पिंप्रद येथे माऊलींच्या पादुकांना स्नान घालुन वारीतील सर्व दिंड्यांच्यावतीने माऊलींना नैवेद्य दाखविण्यात आला. दुपारच्या भोजनानंतर मार्गस्थ झालेला हा सोहळा सायंकाळच्या विसाव्यासाठी वाजेगाव येथे विसावला याठिकाणी स्थानिक मान्यवरांसह ग्रामस्थांनी माऊली....माऊली च्या जयघोषात सोहळ्याचे स्वागत केले. सुमारे अर्ध्या तासाचा विसावा घेवून हा सोहळा बरड मुक्काम स्थळाकडे रवाना झाला.