किल्ले प्रतापगडावर वीर जिवाजी महाले यांचे भव्य स्मारक उभारण्यास मंजुरी बांधकाम मंत्री शिवेंद्रसिंहराजे भोसले व पर्यटन मंत्री शंभुराज देसाई यांच्या संयुक्त बैठकीत महत्त्वपूर्ण निर्णय
स्मारकासाठी निधी उपलब्ध करून प्रस्ताव तातडीने अंतिम करण्याच्या सूचना
News By : Satara
छत्रपती शिवाजी महाराजांचे महापराक्रमी अंगरक्षक, अफजलखान वधाच्या ऐतिहासिक प्रसंगात आपल्या अतुलनीय शौर्याने स्वराज्याचे रक्षण करणारे वीर जिवाजी महाले यांच्या शौर्यगाथेला कायमस्वरूपी अभिवादन करण्याच्या उद्देशाने किल्ले प्रतापगडावर त्यांचा पूर्णाकृती पुतळा व भव्य स्मारक उभारण्यास तत्त्वतः मंजुरी देण्यात आली आहे
सातारा :मुक्तागिरी वेब टीम -
छत्रपती शिवाजी महाराजांचे महापराक्रमी अंगरक्षक, अफजलखान वधाच्या ऐतिहासिक प्रसंगात आपल्या अतुलनीय शौर्याने स्वराज्याचे रक्षण करणारे वीर जिवाजी महाले यांच्या शौर्यगाथेला कायमस्वरूपी अभिवादन करण्याच्या उद्देशाने किल्ले प्रतापगडावर त्यांचा पूर्णाकृती पुतळा व भव्य स्मारक उभारण्यास तत्त्वतः मंजुरी देण्यात आली आहे. राज्याचे सार्वजनिक बांधकाम मंत्री श्रीमंत छ. शिवेंद्रसिंहराजे भोसले आणि पर्यटन मंत्री शंभुराज देसाई यांच्या संयुक्त अध्यक्षतेखाली विधानभवनात झालेल्या बैठकीत हा महत्त्वपूर्ण निर्णय घेण्यात असून स्मारकासाठी निधी उपलब्ध करून प्रस्ताव तातडीने अंतिम करण्याच्या सूचना संबंधित अधिकाऱ्यांना देण्यात आल्या आहे.
बैठकीत किल्ले प्रतापगड परिसरातील पर्यटन विकास, वीर जिवाजी महाले स्मारकाची संकल्पना, निधीची उपलब्धता, जागेची निश्चिती तसेच प्रशासकीय मान्यतांबाबत सविस्तर चर्चा करण्यात आली. महाराष्ट्राच्या इतिहासातील वीर योद्ध्यांच्या पराक्रमाचे जतन करताना पर्यटनालाही चालना मिळावी, या दृष्टीने संबंधित विभागांनी समन्वयाने काम करण्याचे निर्देश दोन्ही मंत्रिमहोदयांनी अधिकाऱ्यांना दिले.
बैठकीस पर्यटन संचालनालयाचे संचालक मंगेश जोशी, महाराष्ट्र पर्यटन विकास महामंडळाचे सदस्य सचिव विजय पोवार, पर्यटन विभागाचे उपसचिव संतोष रोकडे तसेच दूरदृश्य प्रणालीद्वारे सातारा जिल्हाधिकारी संतोष पाटील, वन विभाग, जलसंपदा विभाग तसेच अन्य संबंधित विभागांचे वरिष्ठ अधिकारी उपस्थित होते.
यावेळी पर्यटन विभागाच्या अधिकाऱ्यांनी माहिती दिली की, पर्यटन विभागाच्या ६ फेब्रुवारी २०२३ च्या शासन निर्णयानुसार किल्ले प्रतापगडाच्या पायथ्याशी 'छत्रपती शिवाजी महाराज सृष्टी' हा पर्यटन विकास प्रकल्प राबविण्यात येत असून, या प्रकल्पासाठी सुमारे 10 कोटी रुपयांच्या खर्चास प्रशासकीय मान्यता देण्यात आली आहे. या प्रकल्पामध्ये शिवकालीन इतिहासाचे दर्शन घडविणारे शिल्प, अॅम्फीथिएटर, लाईट अँड साऊंड शो, पर्यटक सुविधा केंद्र, कॅफेटेरिया, प्रदर्शन दालन, सुशोभीकरण आदी विविध कामांचा समावेश आहे.
बैठकीदरम्यान वीर जिवाजी महाले यांच्या स्मारकाबाबत यापूर्वी झालेल्या पत्रव्यवहाराचा आणि प्रस्तावांचा आढावा घेण्यात आला. त्यांच्या ऐतिहासिक योगदानाचे महत्त्व लक्षात घेऊन पूर्णाकृती पुतळा व स्वतंत्र स्मारक उभारण्याचा निर्णय घेण्यात आला. स्मारकासाठी आवश्यक जागा निश्चित करून प्रस्ताव अंतिम करण्याबरोबरच निधी उपलब्ध करून काम तातडीने सुरू करण्याच्या सूचना संबंधित अधिकाऱ्यांना देण्यात आल्या. सार्वजनिक बांधकाम मंत्री शिवेंद्रसिंहराजे भोसले यांनी यावेळी सांगितले की, छत्रपती शिवाजी महाराजांच्या स्वराज्य निर्मितीत मोलाचे योगदान देणाऱ्या वीर जिवाजी महाले यांच्या शौर्याचा गौरव करणे ही राज्य सरकारची जबाबदारी आहे. प्रतापगडावरील हे स्मारक भावी पिढ्यांसाठी प्रेरणास्थान ठरेल आणि इतिहास जिवंत ठेवण्याचे महत्त्वपूर्ण कार्य करेल. प्रतापगड हा महाराष्ट्रातील ऐतिहासिक पर्यटनाचा प्रमुख केंद्रबिंदू असून, जिवाजी महाले यांचे स्मारक उभारल्याने पर्यटकांना स्वराज्याच्या इतिहासाची अधिक प्रभावी माहिती मिळेल. यामुळे ऐतिहासिक पर्यटनाला चालना मिळण्याबरोबरच स्थानिक विकासालाही गती मिळेल, असे ना. शिवेंद्रसिंहराजे म्हणाले.
संबंधित विभागांनी परस्पर समन्वयाने आवश्यक प्रशासकीय प्रक्रिया जलदगतीने पूर्ण करून स्मारक उभारणीचे काम लवकरात लवकर सुरू करावे, अशा सूचना दोन्ही मंत्र्यांनी दिल्या. महाराष्ट्राच्या इतिहासातील एका अद्वितीय शूरवीराला अभिवादन करणारा हा प्रकल्प राज्याच्या ऐतिहासिक, सांस्कृतिक आणि पर्यटन विकासाच्या दृष्टीने महत्त्वपूर्ण ठरणार असल्याचेही यावेळी नमूद करण्यात आले.
* स्वाभिमानी नाभिक संघटना महाराष्ट्र राज्य व शूर वीर जिवाजी महाले उत्सव समिती किल्ले प्रतापगड यांच्या वतीने अनेक वर्ष सातत्याने स्मारक व्हावं यासाठी केलेल्या प्रयत्नाला आज यश आले आणि महाराष्ट्रातील सकल नाभिक समाजाला न्याय मिळाला त्याबद्दल विद्यमान सरकारचे तसेच यासाठी महत्त्वपूर्ण भूमिका बजावणारे राज्याचे बांधकाम मंत्री श्रीमंत छत्रपती शिवेंद्रसिंहराजे भोसले व पर्यटन मंत्री शंभूराजे देसाई यांचे स्वाभिमानी नाभिक संघटनेचा संस्थापक राज्याध्यक्ष या नात्याने सरकारचे मनःपूर्वक धन्यवाद तसेच समाजाच्या वतीने आभार व्यक्त करतो अनेक प्रलंबित मागणीचा आज पाठपुरावा झाला आणि या लढ्याला आज न्याय मिळाला.
श्री शंकराव गायकवाड राज्य अध्यक्ष स्वाभिमानी नाभिक संघटना महाराष्ट्र राज्य
मुनावळे जलपर्यटन प्रकल्पाच्या कामांना मिळणार गती
दरम्यान, जावली तालुक्यातील मुनावळे येथे कोयना जलाशयावर सुरु करण्यात आलेल्या जागतिक दर्जाच्या जलपर्यटन केंद्राच्या कामांचाही आढावा यावेळी घेण्यात आला. मंत्री शिवेंद्रसिंहराजे भोंसले आणि मंत्री शंभुराज देसाई यांनी या प्रकल्पातील सर्व प्रलंबित कामांना तात्काळ गती देऊन नियोजित कालमर्यादेत कामे पूर्ण करण्याचे निर्देश संबंधित विभागांना दिले. बैठकीत आवश्यक असलेल्या अत्याधुनिक सुविधा उभारण्यावर विशेष भर देण्यात आला असून मरीना, जेट स्की पार्किंग जेट्टी, अॅल्युमिनियम रॅम्प, लेक क्रूझिंग बोट, अल्ट्रा लक्झरी हाऊसबोट, सोलर इलेक्ट्रिक क्रूझिंग बोट्स, मल्टीहुल एफआरपी पॅसेंजर बोट, सी ब्रीचर, जेट बोट, फ्लाईंग बोट, कॅटामरान सेलिंग बोट, पॅरासेलिंग बोट, जेट स्की, जेटोव्हेटर तसेच इतर जलक्रीडा उपकरणांच्या उपलब्धतेचा आढावा घेण्यात आला. ज्या उपकरणांचा पुरवठा झाला आहे ती तातडीने कार्यान्वित करण्याचे, निविदा प्रक्रियेत असलेली कामे निश्चित वेळेत पूर्ण करण्याचे निर्देश ना. शिवेंद्रसिंहराजे यांनी संबंधित अधिकाऱ्यांना दिले. महाराष्ट्र प्रदूषण नियंत्रण मंडळाची परवानगी, महावितरणकडून वीजपुरवठा, वन विभागाची ना हरकत, जलसंपदा विभागाशी संबंधित बाबी, सुरक्षा व्यवस्थेसाठी आवश्यक यंत्रणा, बोट क्लब संचालनासाठी आवश्यक सुविधा तसेच धरण परिसरातील सुरक्षा व्यवस्थेचा आढावाही बैठकीत घेण्यात आला.


