फलटण दि. २९ : पत्रकारांविषयी अवमानकारक वक्तव्य करणाऱ्या खा. संजय दिना पाटील यांचा मराठी पत्रकार परिषद, पत्रकार हल्ला विरोधी कृती समिती आणि डिजिटल मीडिया परिषदेच्यावतीने तीव्र शब्दांत निषेध करण्यात आला असून याबाबत शहरातील पत्रकारांनी तहसीलदारांना निवेदन दिले आहे. 

    पत्रकारांना जीवे मारण्याची धमकी देणारे मुजोर खासदार संजय दिना पाटील यांचा मराठी पत्रकार परिषद, पत्रकार हल्ला विरोधी कृती समिती आणि डिजिटल मीडिया परिषद तीव्र शब्दांत निषेध करीत असल्याचे निदर्शनास आणून देत या प्रकरणाची गंभीर दखल घेऊन मुख्यमंत्री देवेंद्र फडणवीस यांनी खा. संजय दिना पाटील यांच्यावर कडक कायदेशीर कारवाई करावी अशी प्रमुख मागणी निवेदनाद्वारे करण्यात आली आहे.

     खा. संजय दिना पाटील यांच्यासह अन्य ५ खासदारांनी शिवसेना (उबाठा) सोडून शिवसेना शिंदे गटात प्रवेश केल्याच्या पार्श्वभूमीवर त्यांची नेमकी भूमिका आणि मत जनतेपर्यंत पोहोचवण्याच्या कर्तव्यापोटी काही पत्रकार त्यांच्या घरी गेले मात्र, तेथे पत्रकारांनी काही अडचणीचे प्रश्न विचारताच खासदार पाटील भडकले आणि त्यांनी थेट शिवीगाळ करण्यास सुरुवात केली. परत आलात तर मारुन टाकीन, माझी तक्रार कोणाकडे करायची ती करा, अशी अर्वाच्च आणि अरेरावीची भाषा वापरली. विशेष म्हणजे, खा. संजय दिना पाटील यांना 'वाय' (Y) दर्जाची सुरक्षा व्यवस्था असून, पोलिसांसमोरच त्यांनी ही धमकी दिल्याने हे प्रकरण अधिकच गंभीर बनले आहे, एका खासदाराला न शोभणारी ही भाषा अत्यंत संतापजनक व निषेधार्ह आहे, एक खासदार स्वतःकडे बॉम्ब असल्याची उघड धमकी देत असेल, तर ती अत्यंत चिंतेची बाब आहे. त्यांच्याकडे खरोखरच बॉम्ब आहे का आणि असल्यास तो कुठून आला, याची सखोल चौकशी झाली पाहिजे, अशी मागणीही पत्रकार परिषदेकडून करण्यात येत आहे.

      पत्रकार संघटनांचे निवेदन आज फलटणचे तहसीलदार डॉ.अभिजीत जाधव यांचेवतीने निवासी नायब तहसीलदार अभिजित सोनवणे यांनी स्वीकारले. यावेळी पत्रकार अरविंद मेहता, अजय माळवे, यशवंत खलाटे, सुभाष भांबुरे, युवराज पवार, नासिर शिकलगार, पोपट मिंड, विनायक शिंदे, ॲड. रोहित अहिवळे, सुधीर अहिवळे, दादासाहेब चोरमले, शक्ती भोसले, सचिन मोरे, विशाल शहा, मितेश उर्फ काका खराडे, अभिजित सरगर, दीपक मदने, अमोल नाळे, प्रवीण काकडे, वैभव गावडे, प्रशांत रणवरे, संजय गायकवाड, वैभव जगताप, सुरेंद्र तथा बाळासाहेब ननवरे, शेखर जगताप उपस्थित होते.

.