फलटण : पहिली बायको असताना दुसरे लग्न का केले यातून झालेल्या वादातून पिंप्रद (ता. फलटण) येथे वडिलांनी मुलाचा कुर्‍हाडीचा घाव घालून खून केल्याची घटना घडली आहे.

याबाबत फलटण ग्रामीण पोलीस स्टेशनमधून मिळालेली माहिती व फिर्यादी दामिनी सूरज भोसले यांनी दिलेल्या फिर्यादीनुसार, मंगळवारी (दि. 27 एप्रिल) सायंकाळी 6.30च्या सुमारास फिर्यादीचे सासरे सिकंदर काळ्या उर्फ डिसमुख भोसले (रा. पिंप्रद, ता. फलटण) यांनी पहिली बायको असताना दुसरी बायको येडाबाई हिच्याबरोबर गाठ बांधल्याने यावरून मुलगा सूरज भोसले व वडिलांच्यामध्ये वादावादी झाली. या वादावादीचे रूपांतर भांडणात झाल्यावर सासरे सिकंदर भोसले यांनी सूरज भोसले यांच्या डोक्यात व डाव्या पायावर कुर्‍हाडीने घाव घालून गंभीर दुखापत करून खून केला आहे, अशी तक्रार फलटण ग्रामीण पोलीस स्टेशनला दाखल करण्यात आली आहे.

दिलेल्या फिर्यादीवरून सिकंदर काळ्या उर्फ डिसमुख भोसले याच्या विरोधात फलटण ग्रामीण पोलीस ठाण्यात गुन्हा नोंद करण्यात आला आहे.

घटनास्थळी अतिरिक्त उपविभागीय पोलीस अधिकारी दहिवडी देशमुख व फलटण ग्रामीण पोलीस स्टेशनचे पोलीस निरीक्षक नितीन सावंत यांनी भेट दिली आहे. 

या घटनेचा पुढील तपास पोलीस उपनिरीक्षक शेख करत आहेत.