कराड, दि. 19 ः कराड शहर पोलीस स्टेशनच्या हद्दीतून चोरी झालेल्या दुचाकी शोधण्यात कराड शहर पोलीस ठाण्याच्या गुन्हे प्रकटीकरण शाखेला यश आले आहे. यामध्ये पोलिसांनी दोन अल्पवयीन बालकांसह आणखी एकास ताब्यात घेतले आहे. त्यांच्याकडून सुमारे साडेचार लाख रूपये किमतीच्या 9 दुचाकी हस्तगत करण्यात आल्या आहेत.
सनी महादेव चव्हाण रा. लक्ष्मीनगर झोपडपट्टी कराड असे ताब्यात घेतलेल्या संशयिताचे नाव आहे.
याबाबत पोलिसांनी दिलेली माहिती अशी, गत काही महिन्यात कराड शहर पोलीस ठाण्याच्या हद्दीतून दुचाकी चोरीचे प्रमाण वाढले होते. याबाबत वरिष्ठ पोलीस निरीक्षक राजू ताशिलदार यांनी गुन्हे प्र्रकटीकरण शाखेस तात्काळ गुन्ह्यांचा छडा लावण्याबाबत सूचना दिल्या होत्या. त्याअनुषंगाने गुन्हे प्रकटीकरण शाखेचे सहाय्यक पोलीस निरीक्षक अशोक भापकर यांचे पथक कसोशीने तपास करीत होते. तपासा दरम्यान सीसीटीव्ही फुटेज व गोपनीय बातमीदारांच्यामार्फत दुचाकी चोरीच्या गुन्ह्यामध्ये दोन अल्पवयीन मुले व सनी चव्हाण याला पोलिसांनी ताब्यात घेतले. त्यांच्याकडे कसून तपास केला असता त्यांनी कराड शहर परिसरातून दुचाकी चोरी केल्याची कबुली दिली असून त्यांच्या चोरी केलेल्या सुमारे साडेचार लाख रूपये किमतीच्या 9 दुचाकी हस्तगत करण्यात आल्या आहेत.
सदरची कामगिरी पोलीस अधीक्षक तुषार दोषी, अप्पर पोलीस अधीक्षक डॉ. वैशाली कडुकर, डीवायएसपी राजश्री पाटील, वरिष्ठ पोलीस निरीक्षक राजू ताशिलदार यांचे मार्गदर्शनाखाली गुन्हे प्रकटीकरण शाखेचे सहाय्यक पोलीस निरीक्षक अशोक भापकर, पोलीस हवालदार सतिश पाटील, संदीप कुंभार, सज्जन जगताप, अनिल स्वामी, संतोष पाडळे, संग्राम पाटील, अमोल देशमुख, धिरज कोरडे, मुकेश मोरे, दिग्वीजय सांडगे, मोहसिन मोमीन, आनंदा जाधव, सोनाली पिसाळ यांनी केली.