“पक्षाने माझ्यावर टाकलेला विश्वास ही मोठी जबाबदारी आहे. कराड तालुक्यात युवकांना संघटित करून त्यांना पक्षाच्या मुख्य प्रवाहात आणण्यासाठी मी प्रामाणिकपणे काम करणार आहे. सामान्य नागरिकांच्या प्रश्नांना प्राधान्य देत युवक काँग्रेस अधिक मजबूत करण्यासाठी प्रयत्नशील राहीन.” - देवदास माने (अध्यक्ष- युवक काँग्रेस कराड तालुका )
कराड : मालखेड (ता. कराड) येथील सामाजिक कार्यकर्ते देवदास दत्तात्रय माने यांची महाराष्ट्र प्रदेश युवक काँग्रेसच्या कराड तालुका अध्यक्षपदी नुकतीच निवड करण्यात आली आहे. प्रदेशाध्यक्ष शिवराज मोरे यांच्या हस्ते त्यांना निवडीचे अधिकृत पत्र प्रदान करण्यात आले.
या निवडीच्या वेळी अखिल भारतीय काँग्रेसचे सचिव तारीक बागवान, युवक काँग्रेसच्या प्रभारी शांभवी शुक्ला, प्रदेश उपाध्यक्ष प्रथमेष आबणावे, प्रदेश सरचिटणीस भुषण रानभरे, जिल्हाध्यक्ष राहुलराज पवार, प्रदेश सरचिटणीस प्राची ताकतोडे, अमित जाधव, प्रदेश सचिव पंकज पोळ तसेच युवक काँग्रेसचे पदाधिकारी व कार्यकर्ते मोठ्या संख्येने उपस्थित होते.
देवदास माने यांच्या निवडीमुळे कराड तालुक्यातील युवक काँग्रेसमध्ये नवचैतन्य निर्माण झाले असून कार्यकर्त्यांत उत्साहाचे वातावरण आहे. विविध क्षेत्रातील मान्यवर, काँग्रेस पक्षातील विविध सेलचे पदाधिकारी व मालखेड ग्रामस्थांनी त्यांचे अभिनंदन करून पुढील कार्यासाठी शुभेच्छा दिल्या.
