कराड : हातकणंगले येथील अत्याचार प्रकरणातील मुख्य आरोपी शाहीद सनदे याचा साथीदार शाहरूख हुसेन देसाई (वय ३०, रा. शिरोली पुलाची, ता. हातकणंगले) याला पोलिसांनी आज कराडमधून ताब्यात घेतले आहे.
या गुन्ह्यातील मुख्य आरोपी शाहीद समीर सनदे (वय २२) याला २६ एप्रिल २०२६ रोजी अटक करण्यात आली होती. त्याला न्यायालयात हजर केले असता, न्यायालयाने २९ एप्रिलपर्यंत चार दिवसांची पोलीस कोठडी सुनावली आहे. शाहीदच्या चौकशीतून मिळालेली माहिती आधारे, शोध पथकाने त्याचा जोडीदार शाहरूख देसाई याला कराड येथून शोधून काढले आणि ताब्यात घेतले.
पोलिसांनी आरोपीने गुन्ह्यात वापरलेला मोबाईल जप्त केला आहे. हा मोबाईल आता फॉरेन्सिक विभागाकडे तांत्रिक विश्लेषणासाठी पाठवण्यात आला आहे. या मोबाईलमधील माहिती आणि तांत्रिक पुराव्यांच्या आधारे या गुन्ह्यात आणखी कोणाचे हात गुंतले आहेत का, याचा शोध पोलीस घेत आहेत.
तपासादरम्यान जे कोणी नवीन संशयित निष्पन्न होतील किंवा ज्यांचा या गुन्ह्यात सहभाग आढळेल, त्या सर्वांवर कठोर कायदेशीर कारवाई केली जाणार आहे. सध्या कराडमधून ताब्यात घेतलेल्या संशयिताची कसून चौकशी सुरू असून, यातून आणखी काही धक्कादायक माहिती समोर येण्याची शक्यता आहे. अधिक तपास उपविभागीय पोलीस अधिकारी अमोल ठाकूर करत आहेत.
