कराड, दि. 14 ः पाचपड फाटा ता. कराड गावच्या हद्दीत भाग्यलक्ष्मी हॉटेलसमोर मालट्रक व चारचाकी गाडीचा भीषण अपघात झाल्याची घटना शनिवारी दुपारी 1 वाजण्याच्या सुमारास घडली. यामध्ये कारमधील तिघेजण जागीच ठार झाले. यामध्ये एका महिलेसह एक पोलीस व युवकाचा समावेश आहे. नितीन बापूसाहेब पोवार (वय 34) मनीषा आप्पासाहेब जाधव (वय 31) व अन्य एक युवक असे अपघातात ठार झालेल्या तिघांची नावे आहेत. यापैकी नितीन पोवार हे कोल्हापूर येथे पोलीस खात्यात कार्यरत आहेत. याबाबत घटनास्थळावरून मिळालेली माहिती अशी की, पुणे-बंगळूर आशियाई महामार्गावर कराड तालुक्यातील पाचवड फाटा येथे भाग्यलक्ष्मी हॉटेल जवळ आयशर ट्रक महामार्गाच्या बाजूला उभा होता. दुपारी एक वाजण्याच्या सुमारास कोल्हापूर बाजूकडून पुणे बाजुकडे भरधाव वेगात निघालेल्या कारने महामार्गावर उभा असलेल्या ट्रकला पाठीमागून जोरदार धडक दिली. या अपघातामध्ये नितीन पोवार यांच्यासह एक युवक व महिला असे तिघेजण जागीच ठार झाले. तर अपघातानंतर कारचा चक्काचूर झाला होता. अपघाताची माहिती मिळताच कराड तालुका पोलीस ठाण्याचे पोलीस निरीक्षक विजय पाटील यांच्यासह महामार्ग पोलीस अधिकारी व कर्मचारी यांनी त्वरित घटनास्थळी धाव घेतली. अपघातामुळे महामार्गावरील वाहतूक सुमारे एक तास विस्कळीत झाली होती. पोलीस कर्मचाऱ्यांनी अपघातग्रस्त वाहने महामार्गावरून बाजूला करून वाहतूक सुरळीत केली. अपघाताचा पंचनामा करण्याचे कार्यवाही सुरू होते.