फलटण : येथील धर्मादाय व शासकीय विभागाशी निगडित अनुदानाचा लाभ उठवणार्‍या हॉस्पिटलचे कोव्हिड रुग्णांसाठी अधिग्रहण करण्यास विरोध करणार्‍या डॉक्टर व राजकीय पुढार्‍यांवर कारवाई करावी, अशी मागणी महाराष्ट्र नवनिर्माण सेनेचे उपजिल्हाध्यक्ष युवराज शिंदे यांनी प्रांताधिकार्‍यांकडे निवेदनाद्वारे केली आहे.
फलटण तालुक्यात कोरोनाबाधित रुग्णांची संख्या दिवसेंदिवस मोठ्या प्रमाणात वाढत असून, फलटण तालुक्यात अद्यापही जिल्हा व स्थानिक प्रशासनाकडून धर्मादाय यांच्याकडे नोंदणीकृत असलेली तसेच शासनाकडून विविध आर्थिक इतर प्रकारे लाभ घेत असलेली अनेक हॉस्पिटल असून, सध्याच्या काळात अशी धर्मादाय व शासकीय निगडित हॉस्पिटल अधिग्रहण करण्यात आली नसून याबाबत महाराष्ट्र नवनिर्माण सेनेच्यावतीने युवराज शिंदे यांनी मुख्यमंत्री उद्धव ठाकरे यांच्यासह स्थानिक व जिल्हा प्रशासनला निवेदन दिले आहे.
या निवेदनात म्हटले आहे की, संपूर्ण देशात अशी हॉस्पिटल अधिग्रहण करून रुग्णांना या हॉस्पिटलमध्ये अधिक उपचार करण्यासाठी दाखल केले जात आहे. परंतु, ऑगस्टचा शेवटचा आठवडा आला तरी सातारा जिल्हाधिकारी शेखर सिंह व फलटणचे प्रांताधिकारी डॉ. शिवाजीराव जगताप यांनी आजअखेर तालुक्यातील कोव्हिड रुग्णांसाठी कोणत्याही प्रकारचे धर्मादाय निगडित अथवा शासनाशी निगडित हॉस्पिटल अधिग्रहण केले नसून यामुळे फलटण तालुक्यातील कोव्हिड रुग्णांवर उपचार करण्यासाठी आजअखेर एकही हॉस्पिटल अधिग्रहण नसल्याचे चित्र असून, यामागे हा मोठा राजकीय दबाव असून यामुळे हॉस्पिटल अधिग्रहण केले जात नाही, हे स्पष्ट आहे. 
शहरातील धर्मादाय विभागाशी निगडित हॉस्पिटल अधिग्रहण करण्याचे सोडून इतर कोणतेही लाभ मिळत नसणारे खासगी हॉस्पिटल नियमबाह्यपणे अधिग्रहण करण्याचा स्थानिक व जिल्हा प्रशासनाचा डाव असून, हा चुकीचा व नियमबाह्य राजकीय दबावाखाली होत असल्याने प्रशासनाने कोणत्याही राजकीय पुढार्‍याच्या दबावाला बळी न पडता धर्मादाय विभागाशी व शासनाशी निगडित लाभ उठवित असलेल्या हॉस्पिटलना अधिग्रहण करण्यात यावे. तसेच या हॉस्पिटल अधिग्रहणास विरोध करणार्‍या डॉक्टर व प्रशासनावर राजकीय दबाव आणणार्‍या पुढार्‍यांवर कोणतीही मुलाहिजा न ठेवता तत्काळ गुन्हे दाखल करण्यात यावे. फलटण तालुक्यातील कोव्हिड रुग्ण उपचाराअभावी दगावल्यास याची सर्व जबाबदारी स्थानिक व जिल्हा प्रशासनाची राहील. याबाबत न्यायालयात दाद मागण्यास अथवा आंदोलन करण्यास महाराष्ट्र नवनिर्माण सेनेला भाग पाडू नये, असा इशाराही निवेदनात देण्यात आला आहे.

 
...अन्यथा ‘मनसे स्टाईल’ने आंदोलन करणार
निकोप हॉस्पिटल शासनाने अधिग्रहीत केले असून, या हॉस्पिटलमध्ये त्वरित कोरोनाबाधितांवर उपचार सुरू करावेत. उपचाराअभावी रुग्ण दगावल्यास प्रशासनास जबाबादार धरून ‘मनसे स्टाईल’ आंदोलन करण्यात येईल. प्रसंगी प्रशासनाच्या विरोधात न्यायालयात दादही  मागू, असा इशारा शिंदे यांनी दिला आहे.