माजी मंत्री शालिनीताई पाटील यांचे आज निधन झाले. मुंबईतील माहिम येथील त्यांच्या राहत्या घरी त्यांनी अखेरचा श्वास घेतला. त्या ९४ वर्षांच्या होत्या. गेल्या काही काळापासून त्या आजारी होत्या.
शालिनीताई पाटील या माजी मुख्यमंत्री वसंतदादा पाटील यांच्या पत्नी होत्या. त्यांच्या पार्थिवावर सातारा जिल्ह्यातील कोरेगाव तालुक्यातील मूळ गावी अंत्यसंस्कार करण्यात येणार आहेत. त्यांच्या निधनाने काँग्रेस पक्षासह राज्याच्या राजकारणावर शोककळा पसरली आहे.
राजकारणात शालिनीताईंनी एक सक्षम आमदार व मंत्री म्हणून ठसा उमटवला. ए. आर. अंतुले यांच्या मंत्रिमंडळात त्यांनी महाराष्ट्राच्या महसूल मंत्रिपदाची जबाबदारी समर्थपणे सांभाळली. मराठा आरक्षणासह विविध सामाजिक प्रश्नांवर त्यांनी ठाम भूमिका घेतली होती. माजी खासदार उदयनराजे भोसले यांनी त्यांना मातेसमान मान देत सदैव साथ दिली होती.
शिवसेनाप्रमुख स्व. बाळासाहेब ठाकरे यांनी शालिनीताईंचा उल्लेख “महाराष्ट्राच्या राजकारणातील वाघीण” असा केला होता. वसंतदादांना राजकीय प्रवासात खंबीर साथ देणाऱ्या शालिनीताईंच्या निधनाने एक ज्येष्ठ व अनुभवी नेतृत्व हरपले आहे.
