आसनगाव : मुंबईहून आलेल्या मित्राला जोशी विहीरला आणायला जाताना झालेल्या अपघातात एकाचा मृत्यू झाला. सुनिल तात्यासाहेब शिंगटे (वय.४१, रा.राऊतवाडी, ता. कोरेगाव) असे मृताचे नाव आहे. सुनिलचा मित्र मुंबईहून येत होता. प्रवासी वाहनाने येताना या परिसरातील नागरिक पुणे-बंगळुरू महामार्गावर वाई -वाठार रस्त्यावरील जोशी विहीर येथे उतरतात. रात्रीची वेळ असल्याने सुनिल पावणे दहा वाजण्याच्या सुमारास त्याच मित्राची दुचाकी घेऊन राऊतवाडीतून एकटाच त्याला आणायला लगबगीने निघाला होता. दरम्यान घाट रस्ता संपल्यावर शिरगाव (ता.वाई) येथे बस स्टॉपशेजारील तीव्र वळणावर पुलाचा अंदाज न आल्याने त्यांची दुचाकी भरधाव वेगात पुलाच्या कठड्याला धडकली आणि वीस फूट खाली ओढ्यात पडली. पावसाअभावी सध्या ओढ्याचे पात्र कोरडेठाक आहे. दगडावर पडल्यामुळे त्याच्या डोक्याला व हातापायाला गंभीर मार लागला होता. उपचारासाठी दवाखान्यात नेताना त्याचा रुग्णवाहिकेत मृत्यू झाला. सुनिलचा स्वभाव सेवाभावी व कष्टाळू होता. इतरांना तो नेहमी मदत करायचा. आण्णा म्हणून तो गावात परिचित होता. त्याच्या पश्चात पत्नी आई, वडील, मुलगा, मुलगी व दोघे लहान भाऊ असा परिवार आहे. आज सकाळी त्यांच्या पार्थिवावर शोकाकुल वातावरणात अंत्यसंस्कार करण्यात आले. यावेळी ग्रामस्थ, नातेवाईक व मित्रमंडळी मोठ्या संख्येने उपस्थित होते.