मुसळधार पावसाचे आगार असणार्‍या कोयना धरण पाणलोट क्षेत्रात सर्वदूर मुसळधार पावसाच्या सरीवर सरी कोसळत आहेत. तसेच 8 जुलैपर्यंत हवमान खात्याने कोकणासह सातारा भागात अतिमुसळधार पावसाचा इशारा दिला आहे. सातारा जिल्ह्याच्या पश्‍चिम भागात पावसाचा जोर असल्याने धरणांच्या पाणीसाठ्यात वाढ होताना दिसत आहे. आज सकाळी आठ वाजेपर्यंत कोयना येथे 156 मिमी, नवजा येथे 244 मिमी व महाबळेश्‍वर येथे 197 मिमी पावसाची नोंद झाली असून धरणाचा पाणीसाठा 17.84 टीएमसी इतका झाला असून उपयुक्त पाणीसाठा 12.71 टीएमसी इतका आहे. पावसाचा जोर कायम असल्याने कृष्णा - कोयना नद्यांच्या पाणी पातळीत वाढ झाली आहे.