नागठाणे : नागठाणे विभाग पत्रकार संघाच्या कार्यक्रमात जाहीर केल्यानुसार मनोजदादांनी पत्रकार (कै.) संभाजी चव्हाण यांच्या कुटुंबियांकडे मदतनिधी सुपूर्द केला. तो स्वीकारताना या कुटुंबियांचे डोळे पाणावले. उपस्थितांची मनेही हेलावून गेली. क-हाड उत्तरचे नेते आणि जिल्हा परिषद सदस्य मनोज घोरपडे यांच्याकडून भरतगाववाडी (ता. सातारा) येथील पत्रकार (कै.) संभाजी चव्हाण यांच्या कुटुंबियांकडे 50 हजार रूपयांचा मदतनिधी सुपूर्द करण्यात आला. या वेळी बोलताना मनोज घोरपडे यांनी संभाजी चव्हाण यांची पोकळी कायम जाणवत राहिल, असे नमूद केले. "संभाजी चव्हाण यांनी पत्रकारितेच्या माध्यमातून स्वतःचा एक ठसा उमटविला होता. अनेक सामाजिक प्रश्नांना आपल्या लेखणीद्वारे वाचा फोडली होती. त्यांचे आपल्यातून आकस्मिक निघून जाणे हे अतिशय वेदनादायी आहे. त्यांची उणीव ही कायम जाणवत राहणारी आहे", असेही मनोजदादा यांनी सांगितले. येत्या काळातही पत्रकार संघाच्या अडीअडचणीला आपण कायम बांधील आहोत, विभागातील पत्रकारांच्या पाठीशी भक्कमपणे उभे राहू अशी ग्वाही त्यांनी दिली. या वेळी नागठाणे विभाग पत्रकार संघाचे अध्यक्ष विकास जाधव, उपाध्यक्ष दत्ता घाडगे, सतीश जाधव, नितीन साळुंखे, विजय घोरपडे, विकास काटकर, प्रमोद पंचपोर, अंजनकुमार घाडगे आदींची उपस्थिती होती. सुनील शेडगे यांनी आभार मानले.