पाचगणी : पुस्तकांचे गाव म्हणून जगप्रसिद्ध असलेल्या भिलार गावात वाढत्या कोरोनाच्या प्रादुर्भावाला आळा घालण्यासाठी भिलार ग्रामस्थांनी स्वयंस्फूर्तीने शुक्रवार, दि. 16 एप्रिल ते मंगळवार, दि. 27 एप्रिलपर्यंत दहा दिवसांचा ‘जनता कर्फ्यू’ जाहीर केला असून, या पाठोपाठ तालुक्याच्या पूर्व भागातील गोडवली, खिंगर, आंब्रळ व राजपुरी या चार गावांतील ग्रामस्थांनी स्वयंस्फूर्तीने दि. 19 एप्रिल ते 30 एप्रिलपर्यंत ‘जनता कर्फ्यू’ जाहीर केला आहे.

महाबळेश्‍वर तालुक्यात कोरोनाच्या दुसर्‍या लाटेने थैमान घातले आहे. त्यामुळे 
याठिकाणी कोरोना रुग्णांची वाढती संख्या लक्षात घेता सातारा जिल्हाधिकारी शेखर सिंह यांनी जारी केलेल्या आदेशाला बांधिल राहत व मुख्यमंत्री उद्धव ठाकरे यांच्या आवाहनाला प्रतिसाद देत वाढत्या कोरोना रुग्णांच्या संख्येला आळा बसावा याकरिता स्वयंस्फूर्तीने अत्यावश्यक सेवा वगळता (मेडिकल, दवाखाने, बँक) इतर सर्व दुकाने बंद ठेवण्याचा निर्णय घेत ‘जनता कर्फ्यू’चा यशस्वी निर्णय घेण्यात आला. 

स्थानिक प्रशासन व व्यापारी बांधव यांनी भिलारमध्ये कडक निर्बंधांंचा अवलंब करत ‘जनता कर्फ्यू’ची अंमलबजावणी सुरू केली आहे. 

यावेळी भिलारचे सरपंच शिवाजी भिलारे, राजेंद्र  (आबा) भिलारे, माजी उपसरपंच अनिल भिलारे, भिलार व्यापारी संघटनेचे अध्यक्ष राजेंद्र भिलारे, शशिकांत भिलारे, वैभव भिलारे, गणेश भिलारे, संदीप पवार, राजेंद्र चव्हाण, तलाठी शशिकांत वणवे, ग्रामस्थ आदी उपस्थित होते.

महाबळेश्‍वर तालुक्याच्या पूर्व भागातील गोडवली, खिंगर, आंब्रळ व राजपुरी या गावांच्या आपत्ती व्यवस्थापन समितीने कोरोना प्रकोपाच्या पार्श्‍वभूमीवर कोरोना महामारी रोखण्यासाठी प्रतिबंधात्मक उपाययोजना राबवत दि. 19 एप्रिल ते 30 एप्रिल पर्यंत 12 दिवसांचा ‘जनता कर्फ्यू’ स्वयंस्फूर्तीने जाहीर केला आहे.