सातारा : ‘राज्यासह जिल्ह्यात दुसर्‍या लाटेत कोरोना रुग्णांची संख्या वाढत आहे. या पार्श्‍वभूमीवर जिल्हा क्रीडा संकुलातील बॅडमिंटन हॉलमध्ये सातारा जिल्हा कोविड रुग्णालय सुरू करण्यात आले आहे. या रुग्णालयात 78 ऑक्सिजन बेड असून कोरोना रुग्णांवर उपचार होणार आहे. रुग्णांना यामुळे निश्‍चितच एक दिलासा मिळणार आहे,’ असे प्रतिपादन पालकमंत्री ना. बाळासाहेब पाटील यांनी केले.

जिल्हा क्रीडा संकुलात नव्याने सुरू करण्यात आलेल्या जिल्हा कोविड रुग्णालयाचे उद्घाटन ना. बाळासाहेब पाटील यांच्या हस्ते झाले. यावेळी ते बोलत होते. 

उद्घाटनप्रसंगी गृह (ग्रामीण) राज्यमंत्री ना. शंभूराज देसाई, खा. श्रीनिवास पाटील, आ. शिवेंद्रसिंहराजे भोसले, मुख्य कार्यकारी अधिकारी विनय गौडा, पोलीस अधीक्षक अजयकुमार बन्सल, अप्पर जिल्हाधिकारी रामचंद्र शिंदे, प्रांताधिकारी मिनाज मुल्ला, तहसीलदार आशा होळकर, जिल्हा शल्यचिकित्सक डॉ. सुभाष चव्हाण आदी उपस्थित होते.

कोरोना रुग्णांना अधिकच्या सुविधा देण्याचा प्रयत्न असल्याचे सांगून पालकमंत्री ना. पाटील म्हणाले, ‘1 मेच्या सकाळी 7 वाजेपर्यंत शासनाने कडक निर्बंध घातलेले आहेत. तरीही काही नागरिक विनाकारण रस्त्यावर फिरत आहेत, त्याचा परिणाम रुग्णवाढीवर होत आहे. तरी नागरिकांनी शासनाने घातलेल्या निर्बंधांचे पालन करावे, असे सांगून ज्या कुटुंबातील व्यक्ती कोरोना बाधित आहेत, अशा कुटुंबातील व्यक्तींनी घराबाहेर पडू नये. तसेच नागरिकांनी मास्कचा वापर, वेळोवळी हाताची स्वच्छता, सुरक्षित अंतर व विनाकरण घराबाहेर पडू नये. या कोरोनाच्या लढाईत सर्वांनी सहकार्य करावे,’ असे आवाहनही ना. बाळासाहेब पाटील यांनी केले.