कराड शहरासह तालुक्यात आयपीएलच्या सट्टेखोरांचा सुळसुळाट दैनिक मुक्तागिरीने प्रकाशझोतात आणल्यानंतर कराड शहर पोलिसांनी ‌‘आयपीएल‌’चा सट्टा लावणाऱ्या दोघांना  ताब्यात घेवून अटक केले आहे.  आरोपींकडून या गुन्ह्यातील महत्वाची माहिती पोलिसांच्या हाती लागली असून साखळीच्या शोधासाठी पोलीस पथक मुंबईला रवाना झाले आहे. या पथकाकडून मुंबईत ठिकठीकाणी छापे टाकण्यात येत आहेत.

कराड त गत काही वर्षांपासून ‌‘आयपीएल‌’वर सट्टा लावला जात आहे. वेळोवेळी पोलिसांनी या सट्टेबाजांवर कारवाई केली आहे. मात्र, तरीही दरवष ‌‘आयपीएल‌’ सुरू होताच शहरात सट्टा लावण्याचे प्रकार घडत आहेत. अशातच गत काही दिवसांपासून शहरात काहीजण ‌‘आयपीएल‌’वर सट्टा लावत असल्याची माहिती पोलिसांना मिळाली होती. त्यानुसार पोलीस सट्टेबाजांचा शोध घेत होते. रविवारी याबाबतची खात्रीशिर माहिती मिळाल्यानंतर सोमवारी पोलिसांनी दोन ठिकाणी छापे टाकून दोघांना ताब्यात घेतले. त्यांच्याकडून मुद्देमालही हस्तगत करण्यात आला आहे.सट्टेबाजारातील साखळीचा शोध घेण्याचे काम सध्या पोलिसांकडून सुरू आहे. तसेच कोणाच्या वरदहस्ताखाली सट्टेबाजार चालविला जातो, याचीही माहिती पोलीस घेत आहेत. अटक केलेल्या आरोपींकडे पोलिसांकडून गोपनीयरीत्या तपास केला जात आहे. त्यांच्याकडून महत्वाचे धागेदोरे पोलिसांच्या हाती लागले आहेत. त्यामुळे तपासासाठी पोलीस पथक मुंबईला रवाना झाले असून त्याठिकाणी छापासत्र सुरू आहे. या गुन्ह्यात आणखी काहीजणांचा सहभाग निष्पन्न झाला आहे. त्यामुळे गुन्ह्यातील आरोपींची संख्या वाढण्याची शक्यता पोलिसांकडून वर्तविण्यात येत आहे.