‘पुणे पदवीधर मतदार संघात महाविकास आघाडीच्या एकत्रित पाठबळामुळे आपला मताधिक्याने विजय झाला. आपल्या विजयामध्ये प्रामाणिकपणे साथ केलेल्या निष्ठावंत कार्यकर्त्यांना पदाच्या माध्यमातून ताकद दिली जाईल,’ असे ठोस प्रतिपादन नवनिर्वाचित आ. अरुणआण्णा लाड यांनी केले.
वडूज : ‘पुणे पदवीधर मतदार संघात महाविकास आघाडीच्या एकत्रित पाठबळामुळे आपला मताधिक्याने विजय झाला. आपल्या विजयामध्ये प्रामाणिकपणे साथ केलेल्या निष्ठावंत कार्यकर्त्यांना पदाच्या माध्यमातून ताकद दिली जाईल,’ असे ठोस प्रतिपादन नवनिर्वाचित आ. अरुणआण्णा लाड यांनी केले.
राष्ट्रवादीचे जिल्हा उपाध्यक्ष प्रा. बंडा गोडसे मित्र मंडळ व वडूज विभागातील पक्ष कार्यकर्त्यांच्या वतीने नुकताच त्यांचा सत्कार करण्यात आला. याप्रसंगी ते बोलत होते.
या वेळी बाजार समितीचे माजी अध्यक्ष विजय काळे, राष्ट्रीय खेळाडू जावेद मनोरे, अनिल लाड, शकिल मुलाणी यांची प्रमुख उपस्थिती होती.
आ. लाड म्हणाले, ‘आपल्या विजयामध्ये खटाव-माणसह सातारा जिल्ह्याचा मोठा वाटा आहे. आपण सर्व प्रथम पदवीधरांच्या प्रलंबित प्रश्नांना न्याय देण्याचा प्रामाणिक प्रयत्न करणार आहे. हे करत असतानाच निवडणुकीत प्रामाणिक सहकार्य करण्याबरोबर कायमस्वरूपी संघटनेबरोबर राहणार्यांना ताकद दिली जाईल. आमदार निधीतून विकासकामे करताना खटाव तालुक्याला झुकते माप देऊ.’
प्रा. बंडा गोडसे म्हणाले, ‘गेली काही वर्षे खटाव तालुक्याला हक्काचा आमदार नाही. आ. अरुणआण्णांनी ही उणीव भरून काढावी. आ. अरुण आण्णांना क्रांतिवीर जी. डी. बापूंचा मोठा वारसा आहे. समृद्ध वारशाबरोबर क्रांती उद्योग समूहाचे रचनात्मक काम ही मोठी जमेची बाजू आहे. पुणे विभागाचे नेतृत्व त्यांच्या हाती जाणे, हे पदवीधरांचे मोठे भाग्य आहे. त्यांच्या सर्व विधायक उपक्रमांना मनापासून पाठबळ देण्यासाठी प्रयत्नशील राहू.’
या वेळी वडूज येथील कार्यकर्त्यांच्या शिष्टमंडळाने क्रांती कारखाना, क्रांती शिक्षण संस्था, क्रांती दूध संघ, क्रांती कुस्ती केंद्र, शेतीमाल प्रक्रिया संघ या सर्व संस्थात्मक कार्याची जवळून पाहणी केली.