बिदाल : ‘माण तालुक्यात जरी दुष्काळ असला तरी या भागातील शेतकर्‍यांची कष्ट करण्याची तयारी असल्यामुळे शेती क्षेत्रातील प्रगती ही उल्लेखनीय आहे. शेतकर्‍यांनी सेंद्रिय शेती करत मत्स्य व्यवसाय व पशुसंवर्धन व्यवसायाकडे वळले पाहिजे,’ असे मत बारामती अ‍ॅग्रिकल्चरल डेव्हलपमेंट ट्रस्टच्या समन्वयक सुनंदाताई पवार यांनी माण तालुक्याच्या एक दिवसीय दौर्‍याप्रसंगी असताना व्यक्त केले. 
माण तालुक्यातील जाधववाडी, बोधे, शिंदी खुर्द, भांडवली, बिदाल, सोकासन, दहिवडी या गावांमधील शेतकर्‍यांच्या भेटी देऊन संवाद साधला. 
यावेळी पाणी फाउंडेशनचे समन्वयक अजित पवार, रावसाहेब देशमुख, भालचंद्र पोळ, रूपेश कदम, सचिन खलाटे आदी मान्यवर उपस्थित होते. 
सुनंदाताई पवार म्हणाल्या, ‘शेतकर्‍यांनी शेतीमध्ये जास्तीत जास्त प्रयोग करून उत्पन्न वाढवले पाहिजे.सध्या कोरोनाच्या संकटात देशाला फक्त शेतकरीच जगवू शकतो. शेतकर्‍यांनी छोट्या पिकाचे फळबागाचे नियोजन व्यवस्थित करून बाजारभावाचे सुद्धा नियोजन करणे गरजेचे आहे. शेतीमध्ये रासायनिक खताचा वापर हा कमी झाला पाहिजे. या भागातील शेतकर्‍यांनी फळबाग बटाटा, कांदा, डाळिंब, वाटाणा अशा मागण्या असणार्‍या पिकांकडे वळले पाहिजे.त्याचसोबत पशुसंवर्धन व मत्स्यपालन हा सुद्धा जोड व्यवसाय करणे गरजेचे आहे. त्याच्यासाठी योग्य प्रशिक्षण व सरकारच्या योजनांची माहिती घेणे गरजेचे आहे. प्रत्येक गावातील महिलांनी गावात छोटे-छोटे बचत गट करून संघटित झाले पाहिजे, त्यातून वेगवेगळे लघू उद्योग सुरू करणे महत्त्वाचे आहे. माण तालुक्यातील शेतकरी हा कष्टकरी असल्यामुळे या भागामध्ये पुढील काळात शेती क्षेत्रातील बदल हे उल्लेखनीय आहेत.’ 
या एक दिवसीय भेटीच्या दरम्यान जाधववाडी, परकंदी, बोधे, शिंदी खुर्द, भांडवली, बिदाल या गावातील सरपंच, उपसरपंच, ग्रामपंचायत सदस्य, तलाठी, ग्रामसेवक, कृषी अधिकारी व गावकरी उपस्थित होते.