वाठार :  पुणे-बंगलोर राष्ट्रीय महामार्गावर वाठार ता. कराड नजिक अज्ञात वाहनाच्या धडकेत बिबट्याचा मृत्यू झाला आहे. याबाबतची माहिती मिळताच घटनास्थळी वन विभागाचे अधिकारी दाखल झाले असून घटनास्थळाचा पंचनामा केला आहे. रविवारी पहाटे 5.30 वाजता वनक्षेत्रपाल बामणोली बाळकृष्ण हसबनिस यांना त्यांच्या सहकारी यांनी राष्ट्रीय महामार्गावर कराड तालुक्यातील वाठारजवळ असलेल्या फल्यओव्हरच्या जवळ एक बिबट्या जखमी अवस्थेत रस्त्यावर पडलेला आहे  माहिती मिळाली.  त्यानंतर वनक्षेत्रपाल हसबनिस यांनी तात्काळ कराड वनक्षेत्रपाल तुषार नवले व मानद वन्यजीव रक्षक रोहन भाटे यांना माहिती दिली. तात्काळ वनक्षेत्रपाल कराड व त्यांची टीम ही वाठार येथे पोहचली  व पाहणी केली असता बिबट्या मृत अवस्थेतील रस्त्यावर पडलेला दिसला. बिबट्या हा  पूर्ण वाढ झालेला नर आहे.  वजन साधारण 45 किलो आहे. वय अंदाजे 4.5 ते 5 वर्ष आहे. स्थळ पंचनामा करून शवविच्छेदनसाठी कराड पशुसंवर्धन दवाखान्यात घेऊन आले. पशुसंवर्धन अधिकारी डॉ. बोर्डे व त्यांच्या सहकाऱ्यांनी यांनी शवविच्छेदन केले. डाव्या बाजूच्या शरीरावरील कंबरेवर जोरात कोणत्या तरी अज्ञात वाहनाने जोरात धडक बसल्याने मोठ्या प्रमाणावर अंर्तगत रक्तस्त्राव  झाले असल्याचे शवविच्छेदन मध्ये स्पष्ट झाले. बिबट्याचे सर्व अवयव, मिश्या, सर्व नखे , सर्व दात हे सुस्थितीत होते. सहायक वनसंरक्षक महेश झंझुरणे वनक्षेत्रपाल तुषार नवले , मानद वन्यजीव रोहन भाटे, वनपाल सावखंडे, वनपाल बाबुराव कदम, वनरक्षक अरुण सोळंकी, रमेश जाधवर, अश्विन पाटील, आदी वनकर्मचारी यांच्या उपस्थितीत बिबट्याचे दहन करण्यात आले.