कराड : प्रतिनिधी

कराड नगरपरिषदेच्या पंचवार्षिक निवडणुकीसाठी आज शुक्रवार दिनांक १४ रोजी २० उमेदवारांचे २३ अर्ज दाखल झाले. मात्र कराड नगरपरिषद नगराध्यक्ष पदासाठी आजपर्यंत एकही अर्ज दाखल झाला नाही, अशी माहिती कराड नगर परिषदेचे निवडणूक निर्णय अधिकारी अतुल म्हेत्रे यांनी दिली.

सर्व उमेदवारांनी नामनिर्देशन अर्जासोबत जोडावयाच्या  कागदपत्रांसह आपले  उमेदवारी अर्ज कराड नगरपरिषदेचे निवडणूक निर्णय अधिकारी अतुल म्हेत्रे यांच्याकडे सादर केले. यावेळी सहाय्यक निवडणूक निर्णय अधिकारी प्रशांत व्हटकर उपस्थित होते.

पाचव्या दिवशी एकूण १४ अर्ज दाखल झाले. त्यामध्ये प्रभाग ३ अ मधून सर्वसाधारण महिला गटातून पवार ज्योती अधिकराव (अपक्ष), प्रभाग ४ अ सर्वसाधारण महिला गटातून मोहिते स्वाती रमेश (भाजप), प्रभाग ४ ब अनुसूचित जाती गटातून रामुगडे शिवाजी कांतीसुरत (भाजप), प्रभाग ७ ब सर्वसाधारण गटातून कुलकर्णी अजय अरविंद (अपक्ष),  प्रभाग ८ ब नागरिकांचा मागास प्रवर्गातून विभूते विनायक शिवलिंग (भाजप),  प्रभाग ९ अ सर्वअसाधारण महिला गटातून साळुंखे विद्याराणी घनश्याम (लोकशाही आघाडी कराड शहर), प्रभाग ९ ब सर्वसाधारण गटातून साळुंखे प्रताप घनश्याम (लोकशाही आघाडी कराड शहर), प्रभाग १० ब सर्वसाधारण गटातून भोपते विक्रम राजाराम (भाजप), प्रभाग ११ ब सर्वसाधारण गटातून रैनाक प्रसाद नरेंद्र (भाजप), प्रभाग १३ अ  नागरिकांचा मागास  प्रवर्ग महिला गटातून हूलवान स्मिता रवींद्र (भाजप), प्रभाग १३ ब  सर्वसाधारण गटातून शाह निखिल प्रमोद व शाह गिरीश बाबूलाल (भाजप), प्रभाग १४ अ  नागरिकांचा मागासवर्ग  प्रवर्ग महिला गटातून भोंगाळे प्रियांका दत्तात्रेय (अपक्ष), १४ ब सर्वसाधारण गटातून पवार महादेव बळवंत (भाजप) आदींनी आपले उमेदवारी अर्ज आज दाखल केले.

  रविवार सुट्टीचा दिवस वगळता १७ नोव्हेंबरपर्यंत सकाळी ११ ते २ ऑनलाईन व ११ ते ३ प्रत्यक्ष नामनिर्देशन पत्र दाखल करण्याची मुदत  आहे.