म्हासुर्णे : म्हासुर्णे, ता. खटाव येथे ‘एक गाव एक गणपती’ ही संकल्पना सर्व सार्वजनिक मंडळ व ग्रामस्थांच्यावतीने राबवण्यात येणार आहे. सध्या सर्वत्र कोरोना सारख्या संसर्गजन्य रोगाचा विळखा दिवसेंदिवस वाढत चालला असून, कोरोनाचे संकट तालुक्यातही गडद होत आहे. गावोगावी कोरोनाचे रुग्ण मोठ्या संख्येने आढळून येऊ लागल्यामुळे गणेशोत्सव काळात ‘एक गाव एक गणपती’ उपक्रम राबवून आधीच कोरोनाच्या लढाईत सर्व पातळीवर व्यस्त असणार्‍या प्रशासनाच्या आवाहनास प्रतिसाद देत म्हासुर्णे गावाने एक वेगळाच आदर्श निर्माण केला आहे.
कोरोनाचा मोठ्या प्रमाणावर होणारा प्रादुर्भाव रोखण्याचे मोठे आव्हान सध्या प्रशासनाच्या पुढे आहे. पोलीस प्रशासनाच्या आवाहनाला अनुसरून म्हासुर्णे येथे ‘एक गाव एक गणपती’ उपक्रमासाठी पोलीस पाटील विकास माने यांनी प्रशासन व ग्रामपंचायतीने गावातील सर्व सार्वजनिक गणेश मंडळांची बैठक आयोजित करण्यात आली होती.
या बैठकीसाठी पोलीस सहायक निरीक्षक शहाजी गोसावी, सरपंच सचिन माने, पोलीस पाटील विकास माने, उपसरपंच सुहास माने, ग्रामपंचायत सदस्य तुषार माने, विठ्ठल माने, सिकंदर मुल्ला, आबा यमगर, श्रीराम विद्यालयाचे चेअरमन महादेव माने, रामचंद्र माने, आण्णासो माने, विठ्ठल माने, तानाजी कदम, चंद्रकांत माने उपस्थित होते.
पोलीस सहायक निरीक्षक शहाजी गोसावी म्हणाले, ‘गावातील तरुण शक्ती या गंभीर परिस्थितीत प्रशासनाच्या व विधायक कामाच्या पाठीशी राहिल्यास प्रशासन त्यांना सर्वतोपरी सहकार्य करील. गावाने व विशेषतः तरुणांनी एकमुखी ‘एक गाव एक गणपती’ या उपक्रमात सहभागी होऊन प्रशासनास सहकार्य करण्याची मोलाची भूमिका घेतली आहे. याचा आदर्श सर्व गावांनी घेऊन कोरोनाच्या काळात प्रशासनाला सहकार्य करण्याची गरज आहे.’
याप्रसंगी म्हासुर्णे गावातील सर्व ग्रामपंचायत सदस्य, सर्व सार्वजनिक गणेश मंडळाचे अध्यक्ष, उपाध्यक्ष, सदस्य व गावातील ग्रामस्थ उपस्थित होते.