पिंपोडे बुद्रुक : ‘सर्व गणेशोत्सव मंडळांनी कोरोनाच्या पार्श्‍वभूमीवर, सामाजिक जाणिवेतून आदर्श निर्माण करत ‘एक गाव एक गणपती’ ही संकल्पना राबवावी. कायदा व सुव्यवस्थेचे उल्लंघन करणार्‍यांवर कारवाई केली जाणार व शासनाच्या नियमांचे पालन करून गणेशोत्सव साधेपणाने साजरा करावा,’ असे आवाहन वाठार पोलीस स्टेशनचे सहायक पोलीस निरीक्षक स्वप्नील घोंगडे यांनी केले.
वाठार स्टेशन येथे शिवसाई मंगल कार्यालयात सार्वजनिक गणेशोत्सव मंडळांची बैठक घेण्यात आली. याप्रसंगी ते बोलत होते.
यावेळी वाठार पोलीस स्टेशनच्या अंतर्गत असणार्‍या 48 गावातील सरपंच, मंडळाचे अध्यक्ष, उपाध्यक्ष, पदाधिकारी, पोलीस पाटील, पत्रकार तसेच कार्यकर्ते उपस्थित होते.
सध्या संपूर्ण जिल्ह्यात कोरोनाचा प्रादुर्भाव मोठ्या प्रमाणात वाढत असून, लोकांनी आरोग्याची काळजी घेऊन जास्तीत जास्त प्रमाणात वाठार पोलीस अंतर्गत असणार्‍या गावांनी ‘एक गाव एक गणपती’ बसवावा व प्रशासनाला सहकार्य करावे. तसेच गणपतीची वर्गणी काढू नये, कोणालाही वर्गणीबाबत सक्ती करू नये, शासनाने दिलेल्या नियमांचे कटाक्षाने पालन करावे, सामाजिक अंतर ठेवावे. 
‘श्री’ची मूर्ती चार फुटांची असावी. पाच पेक्षा जास्त कार्यकर्ते नसावे, मास्क व सॅनिटायझरचा वापर करावा, कोरोनाविषयी लोकांच्यात जनजागृती करावी, सार्वजनिक ठिकाणी काही गैरप्रकार घडणार नाहीत याची मंडळाने दक्षता घ्यावी. समाजोपयोगी उपक्रम राबवावेत. गणेशोत्सव काळात पोलीस प्रशासनाकडून सहकार्य राहील, तसेच कोणी कायद्याचे उल्लंघन केल्यास नियमानुसार कायदेशीर कारवाई करून सदर मंडळावर गुन्हे दाखल केले जातील, याची सर्व मंडळांनी दक्षता घ्यावी, असे आवाहन सपोनि घोंगडे यांनी केले. 
याप्रसंगी धुमाळ, सरपंच यादव यांनीही मार्गदर्शन केले.
यावेळी वाठार परिसरातील सरपंच, पोलीस पाटील, मंडळाचे अध्यक्ष, उपाध्यक्ष, प्रमुख कार्यकर्ते, पोलीस कर्मचारी उपस्थित होते.

http://emuktagiri.in/upload/post/c9fff3e60c.JPG

नियमांचे उल्लंघन केल्यास कारवाई
जिल्ह्यात कोरोनाचा प्रादुर्भाव वाढत असल्यामुळे, सार्वजनिक गणेशोत्सव मंडळांनी प्रशासनाला सहकार्य करून आपापल्या गावात ‘एक गाव एक गणपती’ संकल्पना राबवावी. तसेच आतापर्यंत 30 गावांनी ‘एक गाव एक गणपती’ बसवण्याबाबत पोलीस प्रशासनाला सहकार्य केले आहे. या अगोदर 22 गावांचा समावेश तर त्यामध्ये वाघोली, पिंपोडे खुर्द, भाडळे, देऊर, तडवळे, अनपटवाडी, अरबवाडी, चिलेवाडी अशा गावांचा नव्याने समावेश असून, इतर राहिलेल्या गावांनीही त्यांचा आदर्श घ्यावा. तसेच गणेशोत्सव काळात कोणी कायद्याचे उल्लंघन केल्यास सदरच्या मंडळांवर कायदेशीर कारवाई केली जाईल.