सातारा : येथील प्रा. डॉ. सौ. सरिता बलशेटवार यांना नुकतीच, संत गाडगे महाराज अमरावती विद्यापीठाकडून पीएचडी प्रदान करण्यात आली. त्यांनी कॉम्प्युटर इंजिनिअरिंग शाखेतून, सेंटिमेंट अन्यालिसिस फॉर ऑर्गनायसिंग सोशल ऍक्टिव्हिटीस या विषयावर संशोधन करून विद्यापीठाला प्रबंध सादर केला.

मूळच्या सोलापूरच्या असलेल्या प्रा. बलशेटवार लग्न होऊन सातार्‍यात आल्या तेव्हा त्यांचे शिक्षण केवळ पदविकापर्यंत झाले होते. लग्नानंतर त्यांनी पदवी, पदव्युत्तर व नुकतेच पीएचडीपर्यंत शिक्षण पूर्ण केले. प्रा. सरिता बलशेटवार यांनी कन्याशाळेच्या बीसीए कॉलेजमध्ये अध्यापनाला सुरुवात केली. त्यानंतर त्या गौरीशंकर अभियांत्रिकी महाविद्यालयात प्राध्यापक म्हणून रुजू झाल्या. या ठिकाणी त्यांनी आयटी विभाग प्रमुख देखील काम केले. सध्या त्या कराड येथील, शासकीय अभियांत्रिकी महाविद्यालयात व्याख्याता म्हणून काम करत आहेत.

डॉ. सौ. बलशेटवार यांचे राष्ट्रीय व आंतरराष्ट्रीय पातळीवरील चर्चासत्रात व प्रकाशनांमध्ये शोध निबंध प्रकाशित झाले आहेत. डॉ. सौ. बलशेवार यांचा अनेक सामाजिक उपक्रमांमध्ये देखील सहभाग असतो. अभियांत्रिकी विद्यार्थ्यांच्या प्रोजेक्टचे राज्यस्तरीय प्रदर्शन डीपेक्सच्या त्या सलग 3 वर्षे निमंत्रक होत्या. व सध्या संचालन समितीच्या सदस्य आहेत. डॉ बलशेटवार या अखिल भारतीय विद्यार्थी परिषद या संघटनेच्या जिल्हा प्रमुख आहेत. अत्यंत खडतर अशी साधना करून त्यांनी प्राप्त केलेल्या पीएचडीबद्दल शैक्षणिक, सामाजिक व राजकीय क्षेत्रातील अनेक मान्यवरांकडून त्यांच्यावर कौतुकाचा वर्षाव होत आहे.