वाई : लाखानगर वाई येथे दारु विक्री करत असल्याची माहिती मिळाल्यावरुन पोलिसांनी छापा टाकून युवकास ताब्यात घेतले. त्या युवकाकडून सुमारे इंडिका कारसह एक लाख बारा हजार 840 रुपयांचा ऐवज हस्तगत केला असून त्या युवकावर वाई पोलीस ठाण्यात गुन्हा दाखल करण्यात आला आहे.

लाखानगर येथे रस्त्याच्या कडेला इंडिका कार क्रमांक (एमएच 14 एक्स 0313) मध्ये देशीदारुची चोरटी दारु विक्री करत असल्याची माहिती पोलीस निरीक्षक आनंदराव खोबरे यांना मिळाली. त्यानंतर त्यांनी वाई गुन्हे प्रकटीकरण विभागाच्या कर्मचार्‍यांना तात्काळ छापा टाकण्याचे आदेश दिले. यावेळी टाकलेल्या छाप्यात पाच देशी दारुने भरलेले बॉक्स आढळून आले. त्याच्या ताब्यातील इंडिका कारसह एक लाख 12 हजार 840 रुपयांच्या देशी दारुच्या बाटल्यांच्या बॉक्ससह ऐवज हस्तगत केला. अजय किरण घाडगे (वय 19, रा. लाखानगर वाई) याच्यावर गुन्हा दाखल करण्यात आला आहे. अधिक तपास सहाय्यक पोलीस उपनिरीक्षक विजय शिर्के हे करत आहेत.

ही कारवाई पोलीस अधीक्षक अजयकुमार बन्सल, अप्पर पोलीस अधीक्षक धीरज पाटील, उपविभागीय पोलीस अधीक्षक डॉ. शितल जानवे खराडे यांच्या मार्गदर्शनाखाली पोलीस निरीक्षक आनंदराव खोबरे यांच्या सुचनेनुसार सहाय्यक पोलीस उपनिरीक्षक विजय शिर्के, संजय मोतेवार, कृष्णराज पवार, पो. कॉ. सोमनाथ बल्लाळ, किरण निंबाळकर, श्रावण राठोड यांनी सहभाग घेतला होता.