वरकुटे-मलवडी : राष्ट्रीय समाज पक्षाचे संस्थापक अध्यक्ष महादेव जानकर यांची जन्मभूमी असलेल्या माण तालुक्यातील पळसावडे ग्रामपंचायतीच्या सरपंचपदी तेजश्री रमेश यादव यांची तर उपसरपंचपदी दादासो उत्तम डोंबाळे यांची सर्वानुमते बिनविरोध निवड करण्यात आली.

यावेळी अभिजित अशोक सरतापे, नयना विलास चव्हाण ग्रामपंचायत सदस्य उपस्थित होते. तर ममता धनाजी जानकर, सयाजी बाबू जानकर, कौसल्या दत्ता यादव हे ग्रामपंचायत सदस्य गैैैहजर होते. गावात जातीय सलोखा अबाधित राखून सर्वसमावेशक सदस्यांची निवड झाल्याने ग्रामस्थांनी फटाक्यांची आतषबाजी करीत गुलालाची उधळण करून आनंद व्यक्त केला. 

ग्रामपंचायतीचे सरपंचपद हे सर्वसाधारण स्त्री प्रवर्गासाठी राखीव असल्याने. येथील ग्रामपंचायतीवर राष्ट्रीय समाज पक्ष पुरस्कृत शंभू महादेव ग्रामविकास पॅनेलने सर्वच्या सर्व जागा जिंकून एकहाती सत्ता मिळवली होती. मंगळवारी (दि. 23) दुपारी ग्रामपंचायत कार्यालयात आयोजित करण्यात आलेल्या सरपंच, उपसरपंच पदाच्या निवडीचे निवडणूक निर्णय अधिकारी म्हणून आर. व्ही. महाडिक व ग्रामसेवक उमेश कोळी यांनी काम पाहिले.

यावेळी कर्तव्यदक्ष पोलीस पाटील भाऊसाहेब चव्हाण उपस्थित होते. नवनिर्वाचित पदाधिकार्‍यांचे अ‍ॅड. विलास चव्हाण, चेअरमन कुंंडलिक यादव, खंडू डोंबाळे, प्रकाश चव्हाण, सुरेश यादव, महादेव सरतापे, शैलेश तोरणे, बाळासाहेब यादव, मधुकर पोळ, धनाजी चव्हाण, शंकर यादव, भागवत जानकर, दिलीप सकट या मान्यवरांसह नागरिकांनी अभिनंदन केले.
 
ग्रामस्थांनी माझ्यावर टाकलेला विश्‍वास सार्थ ठरविणार असून, पळसावडे ग्रामस्थांच्या रस्ते, पाणी, आरोग्य, वीज आदी मूलभूत गरजा पूर्ण करणार.
- तेजश्री यादव, नूतन सरपंच, पळसावडे.