कराड : सातारा जिल्हा ॲथलेटिक्स असोसिएशन व कराड तालुका अॕथलेटिक्स असोसिएशन यांच्या वतीने जिल्हा संघटनेचे उपाध्यक्ष अशोकराव थोरात यांच्या अध्यक्षतेखाली जिल्हाधिकारी मा.शेखर सिंह यांना जिल्ह्यातील ॲथलेटिक्स खेळ सराव व क्रीडा स्पर्धा संबंधी मागण्यांचे निवेदन सोमवार देण्यात आले. या निवेदनात खुल्या मैदानावरील स्पर्धाना परवानगी द्यावी,महाराष्ट्र राज्य ॲथलेटिक्स असोसिएशनने कोरोना परिस्थितीत लागू केलेल्या मानक कार्यप्रणाली (SOP) द्वारे जिल्हा निवड चाचणी स्पर्धा घेण्यास मान्यता देऊन खेळाडूंना न्याय द्यावा अशा प्रमुख मागण्यांचा समावेश होता. यावेळी संघटनेचे मार्गदर्शक संचालक एन.आय.एस.कोच मा.दिलीप चिंचकर , उपाध्यक्ष मा.शशिकांत पाटील, उपाध्यक्ष निरंजन साळुंखे ,सचिव योगेश खराडे ,मा.जयवंत पाटील, आदर्श क्रीडा संस्था कराडचे सचिव जगन्नाथ कराळे यांची उपस्थिती होती. संघटनेच्या वतीने निवेदन देताना संघटनेचे उपाध्यक्ष क्रीडाभूषण अशोकराव थोरात भाऊ यांनी जिल्हाधिकारी शेखर सिंह यांना ॲथलेटिक्स खेळाच्या स्पर्धा घेणे आवश्यक का आहे व खेळाडूंचे भवितव्य त्यावर कसे अवलंबून आहे याबाबत माहिती दिली. त्यामुळे ॲथलेटिक्सच्या स्पर्धा घ्यायला परवानगी द्यावी अशी विनंती केली. खेळाडूंचा सराव सुरू आहे पण कोणत्याही स्पर्धाना परवानगी नाही यामुळे खेळाडू खेळापासून दूर जात असल्याची भावनाही त्यांनी व्यक्त केली. त्यावर जिल्हाधिकारी शेखर सिंह यांनी आऊडडोअर तसेच खूल्या मैदानावरील स्पर्धा घ्यायला काही हरकत नाही असे सांगितले.त्यांनी तात्काळ मागणी मान्य केली.यासंबंधीची वर्क आॕर्डर लवकरच प्रशासनाकडून दिली जाईल असे सांगितले.तसेच क्रीडा प्रेमी म्हणून जिल्हाधिकारी यांनी खेळाडूंच्या भवितव्यासाठी आपण सर्वानी प्रयत्न केले पाहिजेत अशी भावना व्यक्त केली त्यासाठी विविध क्रीडास्पर्धा आयोजन करताना सोशल डिस्टन्सचे पालन करुन घ्यायला काही हरकत नाही.तसेच स्पर्धेसाठी प्रेक्षकांना परवानगी देऊ नयेत अशी सूचना केली.सातारा जिल्यात सिथॕंटिक ट्रॅक व्हावा यासाठी कराड तालुक्यातील ॲथलेटिक्स असोसिएशनच्या पदाधिकाऱ्यांनी पाठपुरावा करावा यासाठी प्रशासनाच्या वतीने सर्वतोपरी सहकार्य करू असे आश्वासनही दिले. तेव्हा खेळाडूंसाठी एक आनंदाची बातमी आहे की तुम्ही आता खेळाचा सराव सुरू शकता आणि स्पर्धामध्ये भाग घेऊ शकता. तेव्हा स्पर्धाच्या तयारीला लागावे असे आवाहन जिल्हा ॲथलेटिक्स असोसिएशनचे अध्यक्ष पांडुरंग शिंदे , उपाध्यक्ष अशोकराव थोरात (भाऊ), जिल्हा ॲथलेटिक्स असोसिएशनचे सचिव संजय वाटेगांवकर ,सामना समिती प्रमुख दिलीप चिंचकर यांनी खेळाडूंना तसेच ॲथलेटिक्स खेळाच्या प्रशिक्षक,क्रीडाप्रेमींना केले. ॲथलेटिक्स खेळाच्या स्पर्धा सुरू करण्यासाठी कराड तालुका ॲथलेटिक्स असोसिएशनने घेतलेल्या पुढाकाराबद्दल खेळाडू व क्रीडाप्रेमींमधून समाधान व्यक्त होत आहे.